Vətəndaşlar polis rəislərinə birbaşa müraciət edə biləcəklər - elektron xidmətlər genişlənir
Son illərdə Azərbaycanda dövlət xidmətlərinin rəqəmsallaşdırılması istiqamətində mühüm addımlar atılıb. Xüsusilə elektron hökumət sisteminin tətbiqi vətəndaşların dövlət orqanları ilə əlaqəsinin daha sürətli, şəffaf və səmərəli şəkildə qurulmasına imkan yaradır. Bu proses hüquqi mexanizmlərlə dəstəklənərək, həm vətəndaş müraciətlərinin obyektiv araşdırılmasını təmin edir, həm də ictimai nəzarətin gücləndirilməsinə şərait yaradır. Rəqəmsal idarəetmə mədəniyyətinin formalaşması hüquqi münasibətlərdə də yeni mərhələnin başlanğıcı kimi qiymətləndirilir.
Mövzu ilə bağlı hüquqşünas Ramil Süleymanov Crossmedia.az-a açıqlama verib:
“Azərbaycanda elektron hökümət portalı istifadəyə verildikdən sonra ölkə başçısının müvafiq fərman və sərəncamları əsasında müəyyən xidmətlərin elektronlaşdırılması və vətəndaşların müraciətlərinə baxılması haqqında Azərbaycan Respublikasının qanununun tələblərinə uyğun şəkildə elektron müraciətlərin cavablandırılması qanunvericiliklə tənzimlənməyə başladı. Eyni zamanda müraciətlər zamanı vətəndaşların müraciətlərinin şəffaf şəkildə və dürüst şəkildə araşdırılması üçün və sonra şikayətlərinin mahiyyətinin dəyişməmələri üçün, vətəndaşların elektron qaydada müraciətləri göndərməsi və eyni şəkildə DİN işçilərinin həmin müraciətləri müvafiq qaydada qəbul etməsini nazirlər kabineti təsdiqlədi. Vətəndaşların ərazi polis rəislərinə də çıxışı təmin olundu. Düşünürəm ki, bu vətəndaşların şikayətlərinin daha şəffaf şəkildə araşdırılması təmin olunacaq və bunun nəticəsində neqativ hallar aradan qalxmış olacaq”.
Ayhan
15:09 17.07.2025
Oxunuş sayı: 726
