Xarici xəbərlər
İngiltərə Bankının rəhbəri Rusiyaya etiraz olaraq BVF-nin iclasını tərk edib
İngiltərə Bankının rəhbəri Endryu Beyli Rusiya nümayəndəsinin iştirakı ilə bağlı etiraz olaraq Beynəlxalq Valyuta Fondunun (BVF) iclasını tərk edən maliyyə rəhbərləri arasında olub.Crossmedia.az xəbər verir ki, bu barədə “The Guardian” məlumat yayıb.Beyli Fransa, Almaniya, eləcə də Skandinaviya və Baltikyanı ölkələrin bir sıra nümayəndələri ilə birlikdə Banqkokda keçirilən iclası Rusiya maliyyə naziri Anton Siluanov rus dilində çıxış etməyə başlayanda tərk edib. İngiltərə Bankı Beylinin bu addımda iştirakını təsdiqləyib.
Almaniya Bundesbankının prezidenti Yoahim Nagel bildirib ki, Siluanovun çıxışı başlayanda nümayəndələrin təxminən yarısı iclası tərk edib.
Avropalı diplomat “Reuters” agentliyinə açıqlamasında Ukraynadakı müharibənin Avropa üçün həyati əhəmiyyət daşıdığını və Rusiya ilə münasibətlərin normallaşdırılmasının mümkün olmadığını deyib.
BVF-nin Rəhbər Komitəsinin sədri, Səudiyyə Ərəbistanının maliyyə naziri Məhəmməd əl-Cadaan isə etiraz aksiyasına münasibət bildirib. O, yekun bəyanatın bütün üzvlər tərəfindən razılaşdırıldığını və əsas məsələnin bu olduğunu vurğulayıb.
Almaniya Rusiyanın beynəlxalq arenaya qaytarılması cəhdlərinə qarşı əvvəlcədən xəbərdarlıq edib. Bununla belə, Rusiya maliyyə naziri Siluanov bu il G20 ölkələrinin maliyyə nazirləri və mərkəzi bank rəhbərlərinin toplantısında da iştirak edib. ABŞ isə Avropa ölkələrinin narahatlığına baxmayaraq, Rusiyanın görüşlərdə iştirakını dəstəkləyib.
Banqkokda keçirilən iclasda Rusiya-Ukrayna müharibəsinə, eləcə də ABŞ və İsrailin bombardmanları fonunda Hörmüz boğazı ətrafında yaranan problemlərə baxmayaraq, qlobal iqtisadiyyatın gözləniləndən daha dayanıqlı olduğu bildirilib.
Əl-Cadaan isə yüksək dövlət borcu və istiqraz bazarlarında faizlərin artması fonunda arxayınlaşmağın yolverilməz olduğunu qeyd edib. Onun iclasdan sonra yaydığı bəyanatda qlobal iqtisadiyyatın son sarsıntılara gözləniləndən daha yaxşı tab gətirdiyi, lakin mövcud ehtiyatların azaldığı vurğulanıb.
Bəyanatda həmçinin münaqişələrin və ticarət gərginliyinin artmasının əsas ticarət marşrutlarını poza, enerji məhsulları da daxil olmaqla əmtəə qiymətlərini yüksəldə, enerji və ərzaq təhlükəsizliyini daha da çətinləşdirə biləcəyi bildirilib.
17:00 19.10.2026
Oxunuş sayı: 62
