DİQQƏT: Bu halda 40 manatdan 150 manata qədər cərimə oluna bilərsiniz
Son illərdə ikitəkərli nəqliyyat vasitələrinin — velosiped, motosiklet və mopedlərin — şəhər nəqliyyatında rolu artdıqca, bu istiqamətdə təhlükəsizlik məsələləri daha da ön plana çıxıb. Yol hərəkəti iştirakçılarının məsuliyyətli davranması, qaydalara əməl etməsi və başqalarının təhlükəsizliyini nəzərə alması zərurətə çevrilib. Bu çərçivədə polis əməkdaşları nəzarət və profilaktik tədbirləri intensivləşdirərək, qayda pozan sürücüləri müəyyən edir, maarifləndirmə işləri aparır və yol hərəkəti mədəniyyətinin formalaşmasına töhfə verməyə çalışırlar. Məqsəd, hər bir hərəkət iştirakçısının daha diqqətli olmasıdır.
Mövzu ilə bağlı Crossmedia.az-a açıqlama verən nəqliyyat eksperti Eldəniz Cəfərov bildirib ki, Daxili İşlər Nazirliyinin Dövlət Yol Polisi ilə birgə həyata keçirdiyi maarifləndirmə tədbirləri təqdirəlayiqdir:
“Artıq bir həftədir ki, bu tədbirlər davam edir. Burada əsas məqsəd mikromobillik vasitələrini idarə edən — maped, skuter, velosiped sürən — vətəndaşlarımızın yollarda daha diqqətli olmasıdır. Gənc vətəndaşlarımızın yollarda daha diqqətli olmasını aşılamaq və maarifləndirmək, əslində, yol hərəkətinin tənzimlənməsi və baş verə biləcək qəzaların öncədən qarşısının alınması deməkdir. Adətən yay mövsümündə belə mikromobillik vasitələrindən istifadə edənlərin sayı artır. Bu səbəbdən də yayda belə maarifləndirmə işinin aparılması, düşünürəm ki, daha effektivdir. Artıq qanunvericilikdə mikromobillik vasitələri bir nəqliyyat vasitəsi kimi təsbit olunub. Yəni hər kəs bilməlidir ki, istər mapet olsun, istər skuter, istərsə də velosiped — bunlar əyləncə vasitəsi deyil, nəqliyyat vasitəsidir. Hər hansı bir qayda pozuntusuna görə onları 40 manat məbləğində cərimə gözləyir. Digər hallarda isə 150 manatdan başlayan cərimələr də tətbiq olunur. Düşünürəm ki, bu maarifləndirmə tədbirlərinin keçirilməsində əsas məqsəd həm də məlumatlandırmaqdır ki, gənc vətəndaşlarımız bilsinlər ki, artıq onlar yollarda yol hərəkəti qaydalarına uyğun davranmalıdırlar. Sonrakı mərhələdə əlbəttə ki, bu qayda pozuntularına görə cərimələr tətbiq olunacaq və olunmalıdır”.
Nəzrin Salmanova
16:45 15.07.2025
Oxunuş sayı: 818
