Britaniya kral ailəsində gizli barış görüşü: Çarlz və Herri arasında "buzlar əriməyə başlayır"
Britaniya mediası Kral III Çarlz və oğlu Sasseks hersoqu şahzadə Herrinin müşavirlərinin gizli bir görüş keçirdiyini yazıb.
Crossmedia.az xəbər verir ki, “The Mail on Sunday” qəzetinin məlumatına görə, bu görüş, kral ailəsində uzun müddətdir davam edən gərginliyin azaldılması və barışın mümkünlüyü baxımından mühüm addım ola bilər.
Mənbələrin bildirdiyinə görə, görüş ötən həftə Kral III Çarlzın hamisi olduğu Londondakı eksklüziv üzvlük klubunda keçirilib. Görüşdə hər iki tərəfi yüksək səviyyəli müşavirlər təmsil edib. Bu, şahzadə Herri və həyat yoldaşı Meqan Markl ilə kral ailəsi arasında münasibətlərin yaxşılaşdırılması yolunda atılan ilk rəsmi addım kimi qiymətləndirilir.
Mənbələrin bildirdiyinə görə, görüşün rəsmi gündəliyi olmayıb, lakin iştirakçılar klubun terras hissəsində bir neçə içki içdikdən sonra söhbəti içəriyə daşıyıblar. Görüşü yaxından izləyən şəxslərdən biri, “İllər sonra ilk dəfə kommunikasiya kanalı açıqdır. Hər iki tərəf problemi həll etməyə qərarlıdır” deyə bildirib.
Görüşdə şahzadə Herrini Kaliforniyada yerləşən evinin idarəsinə cavabdeh və baş kommunikasiya müşaviri Meredith Maines təmsil edib. O, xüsusi olaraq bu görüş üçün Los-Ancelesdən Londona gəlib. Kral Çarlzı isə kommunikasiya katibi Tobyn Andreae təmsil edib. Görüşdə eyni zamanda Herri və Meqan cütlüyünün Böyük Britaniyadakı PR komandasının rəhbəri Liam Maguire də iştirak edib.
Meredith Maines bu ilin may ayında şahzadə Herrinin BBC-yə verdiyi müsahibəni təşkil edən şəxs olub. Həmin müsahibədə Herri kral ailəsi ilə barışmaq istədiyini, lakin atası Kral Çarlzın onunla danışmadığını bildirmişdi.
Mənbələrin verdiyi məlumata əsasən, görüş günü yerli vaxtla saat 15:50-də Maines kluba daxil olub, bir neçə dəqiqə sonra Andreae də görüş yerinə gəlib. İlk olaraq bağ terrasındakı masada birlikdə görüntülənən üç nəfər, təxminən 10 dəqiqə sonra klubun içində danışıqlarını davam etdirib.
Mənbə, “Hər kəs hazırda irəliləmək istəyir. Görünür, hər iki tərəf üçün danışmaq üçün doğru zaman yetişib” deyə bildirib. Görüşdə “barış təşəbbüsünün” kimdən gəldiyi dəqiqləşməsə də, prosesin davam etdirilməsi planlaşdırılır.
Mədinə Cəlilova
19:30 13.07.2025
Oxunuş sayı: 729
