Quterreş: “Yaxın şərq müharibə və sülh arasında təhlükəli dönəmdədir”
İranın təşəbbüsü ilə çağırılan BMT Təhlükəsizlik Şurasının fövqəladə iclasında çıxış edən BMT-nin Baş katibi Antonio Quterreş bölgədəki vəziyyətin “son dərəcə təhlükəli bir dönüm nöqtəsinə” çatdığını bildirib.
Crossmedia.az xarici mediaya istinadən xəbər verir ki, Quterreş ABŞ-nin İranın nüvə obyektlərinə endirdiyi zərbələri “bölgədəki ciddi böhranın fonunda təhlükəli dönüş” kimi qiymətləndirib.
“Hazırda qarşılıqlı zərbələrin və cavabların sonsuz spiralı riskini daşıyırıq”, – deyə o vurğulayıb.
Baş katib tərəfləri dərhal və qəti addımlar atmağa çağırıb. O, İranın nüvə proqramı ilə bağlı “ciddi və davamlı danışıqlara” qayıdılmasını istəyib. Quterreşin sözlərinə görə, məqsəd MAQATE müfəttişlərinin tam girişinə və tərəflər arasında etimadın bərpasına yönəlmiş təsdiqlənə bilən razılaşma əldə etmək olmalıdır.
Diplomatik həll yolunun hələ də mümkün olduğunu deyən Baş katib fikrini belə yekunlaşdırıb:
“Qarşımızda iki yol var – biri böyük müharibəyə, digəri isə deeskalasiya və dialoqa aparır. Hansı yolun doğru olduğunu bilirik”.
Zəhra Ağayeva
12:27 23.06.2025
Oxunuş sayı: 652
