Xamenei sui-qəsd halında özünə 3 varis seçib
İsrailin Tehrana qarşı artan hücumları fonunda İranın ali rəhbəri Ayətullah Əli Xameneyi özünü əvəz edə biləcək üç potensial namizədi müəyyən edib.
Crossmedia.az xəbər verir ki, bu barədə “The New York Times” qəzeti məlumatlı mənbələrə istinadən məlumat yayıb.
Nəşrin iddiasına görə, Xameneyi Ekspertlər Şurasına müraciət edərək ölümündən dərhal sonra İslam Respublikasının yeni rəhbərinin həmin üç din xadimi arasından seçilməsini tövsiyə edib. Bu qərarın əsas məqsədi ölkədə daxili sabitliyi və siyasi ardıcıllığı təmin etməkdir.
Məqalədə qeyd olunur ki, 86 yaşlı dini lider son günlərdə təhlükəsizlik tədbirlərini maksimum səviyyəyə çatdıraraq ailəsi ilə birlikdə Tehranın Lavizan bölgəsində yerləşən yüksək mühafizəli yeraltı sığınacağa köçürülüb. Onun yerinin aşkarlanmasının qarşısını almaq məqsədilə bütün elektron rabitə vasitələrindən istifadə dayandırılıb.
Qəzetin vurğuladığına görə, bu addım həm Xameneyinin fiziki təhlükəsizliyini təmin etməyə, həm də ölkə daxilində yaranacaq mümkün siyasi vakuumun qarşısını almağa hesablanıb.
19:49 21.06.2025
Oxunuş sayı: 7385
