Xarici xəbərlər
İsrail-İran arasında qarşılıqlı hücumlar davam edir: 5 İran hərbçisi həlak olub
İsrailin 13 iyun tarixində İrana qarşı başladığı hücumların ardından bölgədə gərginlik səngimir. Artıq 9 gündür davam edən qarşılıqlı zərbələr nəticəsində tərəflər arasında vəziyyət daha da kəskinləşib.
Crossmedia.az xarici mediaya istinadən bildirir ki, İsrailin İrana etdiyi son hava hücumlarından biri Hürremabad şəhərini hədəfə alıb. Hücum nəticəsində İranın seçmə hərbi birliyi olan İnqilab Keşikçiləri Korpusunun (Sepah) 5 üzvü həyatını itirib. İran rəsmiləri hücumu qəti şəkildə pisləyərək cavab tədbirlərinin davam edəcəyini vurğulayıblar.
Digər tərəfdən, Rusiya Prezidenti Vladimir Putin də məsələ ilə bağlı açıqlama verib. O, İsrail tərəfinə dəfələrlə İranın nüvə silahı əldə etmək niyyətində olmadığını bildirdiklərini vurğulayıb. Putin bölgədə artan gərginliyin beynəlxalq təhlükəsizliyə ciddi təhdid yaratdığını qeyd edib.
Hazırda Tel-Əviv və Tehran arasında diplomatik əlaqələrin olmaması səbəbilə hadisələr yalnız hərbi müstəvidə cərəyan edir. Beynəlxalq ictimaiyyət isə tərəfləri təmkinli olmağa və münaqişəni sülh yolu ilə həll etməyə çağırır.
Fatimə Nəbiyeva
11:22 21.06.2025
Oxunuş sayı: 8798
