Tramp qələbəsini elan etdi: Milli Qvardiya Los-Ancelesdə qalacaq
ABŞ Apellyasiya Məhkəməsi Prezident Donald Trampın Kaliforniya Milli Qvardiyasını Los-Anceles şəhərinə yerləşdirməsi barədə qərarını qanuni hesab edərək müvəqqəti olaraq qüvvədə saxlayıb.
Crossmedia.az ABŞ mətbuatına istinadən xəbər verir ki, qərar Trampın immiqrasiya siyasətinə qarşı keçirilən etiraz aksiyalarına qarşı ordu gücündən istifadə etmək planı baxımından əhəmiyyətli bir uğur kimi dəyərləndirilir.
Üç hakimdən ibarət məhkəmə heyəti yekdilliklə Trampın Milli Qvardiyanın yerləşdirilməsi ilə bağlı səlahiyyətlərini qanun çərçivəsində istifadə etdiyi qənaətinə gəlib.
Prezident Tramp sosial şəbəkədəki paylaşımında qərarı “Böyük Qələbə” adlandırıb və bu qərarın, yerli hüquq-mühafizə orqanlarının yetərsiz qaldığı hallarda digər ştatlarda da bənzər tədbirlərin görülməsinin qarşısını açacağını qeyd edib.
Daha əvvəl Kaliforniya ştatı Tramp administrasiyasını məhkəməyə vermiş, alt məhkəmə isə qubernatoru haqlı çıxararaq qərarın qanunsuz olduğunu bildirmişdi. Lakin Tramp administrasiyası bu qərardan apellyasiya şikayəti verib.
Məhkəmə Trampın “prezidentin Milli Qvardiyanı yerləşdirmə səlahiyyətinin məhkəmə nəzarətindən kənar olduğu” arqumentini rədd edib.
Prezident Trampın göstərişi ilə Los-Ancelesə təxminən 4 min 100 nəfərlik Milli Qvardiya və Dəniz Piyadası göndərilib. Kaliforniya rəsmiləri etiraz aksiyalarının zaman-zaman zorakı hal aldığını qəbul etsələr də, ştat və yerli hüquq-mühafizə orqanlarının vəziyyəti nəzarət altında saxlamaq üçün kifayət etdiyini bildiriblər.
Qeyd olunub ki, indiyədək heç bir prezident qubernatorun razılığı olmadan bir ştatın Milli Qvardiyasını yerləşdirməmişdi.
Ekspertlərə görə, bu iş üzrə çıxarılan qərar Trampın gələcəkdə digər ştatlarda da bənzər tədbirlər görüb-görməyəcəyinə dair əsaslı təsir göstərə bilər.
Əvvəlki instansiyada federal hakim Çarlz R. Breyer Trampın yerləşdirmə qərarının həm hüquqi səlahiyyətləri aşdığını, həm də ABŞ Konstitusiyasını pozduğunu qeyd edərək birliklərin nəzarətinin qubernatora verilməsinə qərar vermişdi. Lakin Trampın apellyasiya şikayəti nəticəsində 9-cu Dairə Apellyasiya Məhkəməsi qərar qüvvəyə minmədən Milli Qvardiyanın Los-Ancelesdə qalmasına icazə verib.
Mədinə Cəlilova
03:00 21.06.2025
Oxunuş sayı: 618
