ABŞ hökumətində İran gərginliyi: “Heç kim onunla danışmır”
ABŞ Prezidenti Donald Trampın İranla bağlı mümkün hərbi müdaxilə planları dar bir müşavir qrupu ilə müzakirə olunur. İddialara görə, bu planlamalara müdafiə naziri Pit Hegseth daxil edilmir və Ağ Ev onunla təmasdan yayınır.
Crossmedia.az xəbər verir ki, ABŞ administrasiyasındakı yüksək vəzifəli bir mənbə “The Washington Post” qəzetinə bildirib ki, “Heç kim Hegseth ilə danışmır”. Prezident Trampın İsrailin İrana qarşı hücumlarına ABŞ-nin müdaxilə edib-etməyəcəyinə dair qərar verməsi üçün iki həftəlik müddət təyin etdiyi deyilir.
Hegseth-in, Trampa məsləhət verən əsas qrupdan ayrıldığı bildirilir. Sözügedən qrup vitse-prezident JD Vance, dövlət katibi Marko Rubio, Mərkəzi Kəşfiyyat İdarəsinin (CIA) direktoru Con Ratklif və Birləşmiş Qərargah Rəisləri Komitəsinin sədri general Dan Keyndən ibarətdir. “Washington Post” bu dörd nəfəri prezidentin “birinci səviyyəli hərbi və kəşfiyyat məsləhətçiləri” kimi təqdim edir.
Pentagon isə Hegseth-in prosesdə yaxından iştirak etdiyini bildirsə də, üç aktiv ABŞ rəsmisi əsas brifinqlərin və müharibə planlamasının generallar Keyn və Kurilla tərəfindən həyata keçirildiyini, Hegseth və onun komandası ilə heç bir əməliyyat əlaqəsinin olmadığını təsdiqləyib. Rəsmilərdən biri deyib:
“Heç kim Hegseth ilə danışmır. Onunla Ağ Ev arasında əməliyyat baxımından heç bir əlaqə yoxdur”.
Xatırladaq ki, Pete Hegseth bu ilin əvvəlində hazırda Milli Kəşfiyyat Direktorluğuna rəhbərlik edən Talsi Qabbard ilə birlikdə müdafiə naziri təyin olunmuşdu. Lakin son aylarda onun administrasiyadakı təsirinin azaldığı iddia edilir. Bu geriləmədə, jurnalistin təsadüfən daxil olduğu bir söhbət qrupunda Hegseth tərəfindən Yəməndəki husilərə qarşı hücumlarla bağlı məxfi məlumatların paylaşılmasının ciddi rezonans doğurması əsas amil kimi göstərilir.
Mədinə Cəlilova
01:00 21.06.2025
Oxunuş sayı: 10447
