Rəqəmsal qaranlıq: Müharibə İranda interneti iflic edib
İranda internetə tətbiq edilən məhdudiyyətlər ölkə tarixinin ən ciddi kəsintisi kimi qiymətləndirilir. Hökumət rəsmiləri çərşənbə axşamı internet xidmətlərinə məhdudiyyət qoyulduğunu təsdiqləyib. Bildirilib ki, bu addım İsrailin mümkün kiber hücumları fonunda şəbəkə sabitliyini qorumaq məqsədi daşıyır.
Crossmedia.az xəbər verir ki, Hökumət sözçüsü Fatimə Məhəcərani məhdudiyyətlərin “müvəqqəti, hədəflənmiş və nəzarət olunan” olduğunu bildirib. Lakin ölkə üzrə bir çox İranlı mobil şəbəkə və ev internet xidmətlərinə çıxışın ya tamamilə dayandığını, ya da ciddi şəkildə zəiflədiyini bildirir.
VPN xidmətlərindən istifadə edən vətəndaşlar belə internetə qoşula bilmədiklərini qeyd edir. Qeyd edək ki, VPN-lər İranda əvvəldən qanunsuz elan olunub.
NetBlocks izləmə qurumunun məlumatına əsasən, bəzi bölgələrdə fasilələr 24 saatdan çox davam edib və bu vəziyyət 2019-cu ilin noyabr etirazlarından sonra yaşanan ən ciddi əlaqə böhranı hesab olunur.
İnternetin kəsilməsi milyonlarla insanı gündəlik fəaliyyətlərdə, o cümlədən maliyyə əməliyyatları və beynəlxalq əlaqələrdə çətin vəziyyətə salıb. Bir istifadəçi bildirib: “Snapp (populyar nəqliyyat tətbiqi) üçün sürücülük edirəm, lakin GPS və naviqasiya sistemləri işləmədiyi üçün artıq işləyə bilmirəm.”
Çox sayda iranlı video və səsli mesaj göndərə bilmədiyini, bəzi bölgələrdə isə ümumiyyətlə internetin olmadığını təsdiqləyib. Tehrandan bir istifadəçi qeyd edib: “Sadə mesajlaşma belə çətinliklə işləyir”.
Mədinə Cəlilova
00:00 21.06.2025
Oxunuş sayı: 582
