“Son zəng” həyatın növbəti mərhələsinə başlanğıc rəmzidir — AÇIQLAMA
Bu gün 14 iyun - “Son zəng” günüdür. “Son zəng” – hər bir məktəbli üçün duyğuların ən zirvə nöqtəsi, keçmişlə gələcək arasında körpü olan bir andır. Sanki məktəbin divarlarına hopmuş xatirələr, parta yoldaşlarının gülüşləri və müəllimlərin nəsihətləri həmin gün son dəfə bir araya gəlir.
Bu həm də yeni başlanğıclar deməkdir. Bir tərəfdən məktəb illərinin şirin nostaljisi, digər tərəfdən gələcəyin qeyri-müəyyən həyəcanı… “Son zəng” zamanı duyulan hisslər qarışıqdır: sevinc, kədər, ümid və həyəcan sanki iç-içə keçir… O an, məktəb illərinin nağılı bitir, amma yeni bir hekayə başlayır.
Mövzu ilə bağlı Crossmedia.az-a açıqlama verən Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov ilk olaraq bu gün məzun adını almış şagirdləri təbrik edib, onlara həyatlarının növbəti mərhələsində yeni-yeni uğurlar arzulayıb:
“ “Son zəng” hər bir insanın həyatında yadda qalan, əlamətdar hadisələrdən biridir. Onbirillik təhsil həyatında onlara vətəndaş olaraq yetişməkdə dəstək verib, onları öz övladları kimi qəbul etmiş məktəb şagirdlərinə biliklər və eyni zamanda həyati bacarıqlar aşılayıb. “Son zəng” onbirillik məktəb həyatına vida zəngi olmaqla yanaşı, həyatın növbəti mərhələsinə başlanğıcın rəmzidir. Hər bir insanın həyatında “Son zəng”in böyük əhəmiyyəti var və bu gün məzun olmuş şagirdlər artıq məktəbli deyil, məzundurlar. Bu gün həm də bir hesabatdır — geriyə baxıb, 11 il ərzində məktəbdən əldə edilən biliklərin və formalaşan dəyərlərin qiymətləndirilməsidir. Mən inanıram ki, bizim övladlarımız ağıllı, düşüncəli və məsuliyyətli gənclərdir. Onların bir qismi tələbə olacaq, bir qismi təhsillərini davam etdirəcək. Bu gün onlar bu biliklərlə yola çıxmaq fürsətini əldə edirlər”.
İ.Orucov vurğulayıb ki, ölkəmizdə “Son zəng” həmişə xoş aura ilə qarşılanır:
“Biz valideynlər, müəllimlər və istənilən yaşda insanlar bu günü yaşayaraq keçmişimizi xatırlayırıq — bir vaxtlar məktəbli olduğumuz dövrün “Son zəngini” yada salırıq. Bu hadisə təkcə bu gün məktəbi bitirənlər üçün deyil, əvvəlki məzunlar üçün də nostalji hisslər yaşadan bir hadisədir. Əminəm ki, bizim gənclərimiz məktəbdə qazandıqları bilikləri və dəyərləri həyat yollarında istifadə edərək uğurlu gələcək quracaqlar. Bu gün məzun olanlar arasında böyük alimlər, nüfuzlu şəxsiyyətlər və ziyalılar yetişəcək. Onlar Azərbaycanın gələcəyini inşa edəcək və ölkəmizin inkişafına töhfə verəcəklər. Mən onlara bu yolda uğurlar arzulayıram! Eyni zamanda, onların valideynlərinə və ailələrinə gözaydınlığı verirəm — bu gün onların sevincidir, qürurudur. “Son zəng” eyni zamanda böyük bir təhsil hadisəsidir. Bir təhsil ilinin yekunudur. Övladlarımızın yetişməsində mühüm rol oynayan müəllimlərimizə dərin minnətdarlığımı bildirirəm. Bu gün öz müəllimlərimi xatırlayır, dünyadan köçənləri rəhmətlə anır, yaşayanlara isə möhkəm cansağlığı arzulayıram. Müəllim peşəsinin ən böyük nəticəsi məzunlardır və məktəbin cəmiyyət üçün əhəmiyyəti bu gün bir daha göz önünə gəlir. İstənilən insan harada olursa olsun, öz məktəbini unutmur, çünki məktəb insanı formalaşdıran mühitdir. Məktəb yalnız bilik vermir — əxlaq öyrədir, dəyərləri aşılayır, vətənpərvərlik ruhunu yaşadır. Sosial mühit olaraq məktəbdən gözəl mühit yoxdur. Bu gün məktəb daha çox gündəmdədir, diqqət mərkəzindədir, “Son zəng” məktəbin əhəmiyyətini bir daha ön plana çıxarır.
Bu gün şəhərin hər nöqtəsində məktəbə vida edən gənclərin üzlərindəki sevinci, ümid dolu baxışlarını gördüm. Həyat eşqi onların gözlərində parlayır və bu hissi onlara məhz məktəb aşılayıb”.
Nəzrin Salmanova
18:06 14.06.2025
Oxunuş sayı: 957
