Elmar Məmmədyarov razılaşmadı - Kanadanın mövqeyi ermənipərəst deyil
2025-ci ilin iyun ayında Azərbaycan Respublikası ilə Kanada arasında ilk dəfə keçirilmiş siyasi məsləhətləşmələr iki ölkə arasında diplomatik münasibətlərdə yeni mərhələnin başlanğıcı kimi qiymətləndirilə bilər. Bu cür məsləhətləşmələr beynəlxalq təcrübədə dövlətlərarası siyasi dialoqun qurulması, qarşılıqlı maraq doğuran məsələlərin müzakirəsi və mövcud əməkdaşlıq potensialının reallaşdırılması baxımından əhəmiyyətli alət hesab olunur. Azərbaycanın son illərdə həyata keçirdiyi balanslı və çoxtərəfli xarici siyasət strategiyası fonunda Kanada ilə bu formatda təmasların qurulması, tərəflər arasında qarşılıqlı anlaşma və etimadın gücləndirilməsi baxımından müsbət bir addım kimi çıxış edir. Tarixən Azərbaycanın suverenliyi və ərazi bütövlüyünü dəstəkləyən Kanada ilə bu istiqamətdə dialoqun institusional əsasda davam etdirilməsi gələcək əməkdaşlıq perspektivləri üçün mühüm zəmin yarada bilər.
Mövzu ilə bağlı Crossmedia.az-a Azərbaycanın keçmiş Xarici İşlər naziri Elmar Məmmədyarov açıqlama verib: “Doğrudur, bu mərhələdə nəticələr haqqında konkret fikir bildirmək tezdir. Lakin qeyd etmək lazımdır ki, siyasi məsləhətləşmələrin özü artıq əhəmiyyətli hadisədir və müəyyən gözləntilər formalaşdırır. Belə görüşlər tərəflərə imkan verir ki, öz mövqelərini ortaya qoysunlar, gündəlikdəki əsas məsələləri müzakirə etsinlər və ortaq məqamlarda razılığa gəlməyə çalışsınlar. Lakin bu prosesin səmərəliliyini dəyərləndirmək üçün danışıqların mövzusu və gündəliyi barədə daha ətraflı məlumata ehtiyac var”.
E.Məmmədyarov Kanadanın uzun müddət ermənipərəst mövqeyi ilə tanınmasına da münasibət bildirib: “Mən bu fikirlə tam razı deyiləm. Xatırladığım qədərilə, vəzifədə olduğumuz dövrlərdə biz dəfələrlə Kanada Xarici İşlər Nazirliyi ilə təmasda olmuş, sual-cavab formatında müxtəlif məsələləri gündəmə gətirmişdik. Hər dəfə NATO çərçivəsində və ikitərəfli münasibətlərdə bizə təsdiq edilirdi ki, Kanada Azərbaycanın suverenliyini, ərazi bütövlüyünü – o cümlədən Qarabağ bölgəsini – birmənalı şəkildə bizim ərazimiz olmasını tanıyır. Onlar da qeyd edirdilər ki, bu mövqeləri BMT Təhlükəsizlik Şurasının məlum olan dörd qətnaməsi əsasında formalaşıb və münaqişənin məhz bu sənədlər əsasında həll olunmasını vacib sayırlar”.
Sabiq nazir hesab edir ki, bu siyasi məsləhətləşmələri Azərbaycanın xarici siyasətində balanslı tərəfdaşlıq axtarışlarının bir hissəsi kimi qiymətləndirmək olar: “Bəli, bu yanaşmanı tam əsaslı hesab etmək olar”.
Ləman Həsənova
17:45 11.06.2025
Oxunuş sayı: 1063
