Milli İncəsənət Muzeyində “Nesvij – dünya mədəniyyətinin irsi” adlı sərgi açılıb
Azərbaycan Milli İncəsənət Muzeyində “Nesvij – dünya mədəniyyətinin irsi” mövzusunda sərgi keçirilib. Sərgi Mədəniyyət Nazirliyi və Belarus Respublikası Mədəniyyət Nazirliyinin dəstəyi ilə Azərbaycan Milli İncəsənət Muzeyi və Nesvij Muzey-Qoruğu tərəfindən təşkil olunub.
Crossmedia.az xəbər verir ki, 23 planşetdən ibarət sərgidə muzey-qoruğun yerləşdiyi Nesvij qəsrinin XVI-XVIII əsrlərə aid eksteryer və interyerlərinin təsvirləri, sərgi salonlarının fotoşəkilləri təqdim olunub, həmçinin videoçarx nümayiş etdirilib.
Sərgi çərçivəsində ziyarətçilər üçün interaktiv ünsiyyətə əsaslanan “Saray ziyafətləri ənənələri” adlı ekskursiya təşkil olunub. Proqramda saray qəbullarının tərkib hissəsi olan rəqs sənəti, saray mətbəxinin ekzotikası, knyaz ovunun təşkilinin xüsusiyyətləri, intellektual əyləncələr və oyunlar kimi mövzulara toxunulub.
Litva Böyük Hersoqluğunun varlı Radzivil ailəsinin iqamətgahı kimi xidmət edən Nesvij qalası intibah gözəlliyi, barokko dinamikası və klassik nizamın ahəngdar birləşməsinin parlaq nümunəsidir. UNESCO-nun Ümumdünya İrs Siyahısına daxil edilmiş bu görkəmli memarlıq abidəsini haqlı olaraq həm Belarus, həm də bütün Avropa mədəniyyətinin canlı ensiklopediyası hesab etmək olar. Onun tərkibinə təkcə qalanın özü deyil, həm də müdafiə istehkamları və böyük park kompleksi daxildir. Bu gün Nesvij qəsri və onun təxminən əlli muzey zalı həm qədim, həm də müasir Belarus mədəniyyətinin nailiyyətlərini nümayiş etdirən xüsusi məkandır.
Belarus Respublikasının Azərbaycandakı fövqəladə və səlahiyyətli səfiri Dmitri Pineviç jurnalistlərlə söhbətində qeyd edib ki, bu mədəni hadisə iki xalq arasında dostluğun və qarşılıqlı anlaşmanın möhkəmləndirilməsi yolunda mühüm addımdır.
“Xüsusi məmnuniyyətlə qeyd edirəm ki, biz bir daha bizi mədəni məkanda birləşdirən, həm də qarşılıqlı hörmət və dialoq işinə xidmət edən təşəbbüsü həyata keçiririk”, - deyə o vurğulayıb. - Nesvija həsr olunmuş sərgi, şübhəsiz ki, əməkdaşlığımızın xəzinəsinə daha bir mühüm töhfə olacaq”.
Dmitri Pineviç həmçinin xatırladıb ki, sərgi iki ölkənin mədəniyyət nazirlikləri arasında mövcud saziş çərçivəsində keçirilir və bu ilin payızında Belarusda Azərbaycan Mədəniyyəti Günlərinin keçiriləcəyinə ümidvar olduğunu bildirib.
“Biz gözləyirik ki, bu, mədəni əlaqələrimizin davamlılığı və dinamizminin daha bir bariz göstəricisi olacaq”, - deyə diplomat sözünü yekunlaşdırıb.
Daha sonra söhbəti davam etdirən Belarusun “Nesvij” Milli Tarix-Mədəniyyət Muzey-Qoruğunun direktorunun birinci müavini Nataliya Jerko vurğulayıb ki, muzey Azərbaycanda yeni sərgilərin keçirilməsi imkanını nəzərdən keçirir.
“Biz istərdik ki, azərbaycanlı həmkarlarımızla birgə layihələr həyata keçirək, təkcə sərgi layihələri deyil, həm də elmi fəaliyyət, seminarlar, konfranslar çərçivəsində əməkdaşlıq edək”, - deyə o qeyd edib. - Biz çox şadıq ki, yeni tərəfdaşlıqlarımız, yeni tanışlıqlarımız olur, qarşılıqlı fəaliyyətin sərhədləri genişləndirilir”.
Nataliya Jerko, həmçinin bildirib ki, muzey bundan sonra da Azərbaycan Milli İncəsənət Muzeyi ilə birgə layihələr üçün yeni imkanlar axtaracaq.
Sərgi 2025-ci il iyunun 15-dək açıq olacaq.
10:40 20.05.2025
Oxunuş sayı: 804
