"Azərbaycan türk birliyində fəal iştirak etməyə, həm də Qərblə gərginlikdən yayınmağa çalışır" - ŞƏRH
Azərbaycanın son dövrlərdə Türk dünyası ilə inteqrasiyanı gücləndirməsi, Şimali Kipr Türk Cümhuriyyəti ilə münasibətlərə də təsir göstərir. Rəsmi səviyyədə tanınma olmasa da, verilən siyasi mesajlar və diplomatik addımlar bu istiqamətdə irəliləyişin olduğunu göstərir. Bu yanaşma həm regional həmrəyliyi möhkəmləndirir, həm də Azərbaycanın beynəlxalq mövqeyini yeni formatda formalaşdırır.
Mövzuya dair sualları AMEA-nın elmi işçisi, siyasi şərhçi Vüsalə Gülmalıyeva Crossmedia.az-a açıqlamasında cavablandırıb.
Onun sözlərinə görə Şimali Kiprlə Türk dünyası əməkdaşlığı tədricən daha açıq şəkildə formalaşır: "Ən mühüm simvolik addımlardan biri 2024-cü il Antalya Diplomatiya Forumunda atıldı – burada Azərbaycan Prezidenti İlham Əliyev Şimali Kipr Türk Cümhuriyyətinin Prezidenti Ersin Tatarla görüşdü. Bu görüş Azərbaycanın rəsmi səviyyədə Şimali Kiprlə ilk yüksək təmaslarından biri kimi tarixə düşdü. Görüş zamanı Prezident Əliyev Türk dünyası çərçivəsində həmrəyliyin vacibliyini vurğuladı və Azərbaycanın bu istiqamətdə prinsipial mövqeyini nümayiş etdirdi. Bundan başqa, 2023-cü ildə ADA Universitetində keçirilən tədbirdə çıxışı zamanı Prezident İlham Əliyev açıq şəkildə bildirmişdi ki, biz Türk Dövlətləri Təşkilatı olaraq Şimali Kipr Türk Cümhuriyyətinə dəstək göstərməliyik. O qeyd etmişdi ki, bu dəstək yalnız mədəni və humanitar sahədə deyil, siyasi səviyyədə də gücləndirilməlidir. Bu çıxış Prezidentin məsələyə olan açıq və strateji yanaşmasını əks etdirir".
Müsahibimizin fikrincə, Azərbaycan hələlik Şimali Kipri rəsmi olaraq tanımasa da, diplomatik jestlər, yüksək səviyyəli görüşlər və siyasi bəyanatlarla dəstəyini ifadə edir: "Bu isə Türkiyə ilə həmrəyliyin və Türk dünyası çərçivəsində birliyin güclənməsinin bariz nümunəsidir. Azərbaycanın Şimali Kipri rəsmi şəkildə tanıması ölkə daxilində ictimaiyyət tərəfindən geniş dəstək qazanacaq. Çünki Azərbaycan cəmiyyətində Türkiyəyə və türk həmrəyliyinə dərin rəğbət mövcuddur. Xüsusilə son illərdə bu bağlılıq daha da güclənmişdir. Lakin xarici siyasət kontekstində bu addım müəyyən narahatlıqlara səbəb ola bilər. Ermənistanla davam edən sülh prosesi, Avropa İttifaqı ilə əlaqələr və beynəlxalq münasibətlərdə balansın qorunması bu çərçivədə diqqətlə nəzərdən keçirilməlidir. Azərbaycan son illərdə balanslı siyasət yürüdərək həm türk birliyində fəal iştirak etməyə, həm də Qərblə gərginlikdən yayınmağa çalışır. Bununla belə, Prezident İlham Əliyevin son çıxışları göstərir ki, rəsmi tanınma olmasa belə, siyasi jestlər və beynəlxalq platformalarda birlik nümayiş etdirmək mümkündür və bu, daxildə milli həmrəyliyi möhkəmləndirir".
Həmsöhbətimiz qeyd edib ki, Türk dünyası birgə şəkildə Şimali Kiprə daha açıq və siyasi dəstək göstərsə, bu, regional siyasətdə mühüm dəyişikliklərə səbəb ola bilər: "İlk növbədə bu addım Türk Dövlətləri Təşkilatının yalnız mədəni platforma deyil, real siyasi güc kimi çıxış etdiyini nümayiş etdirər. Eyni zamanda, bu, Yunanıstan və Cənubi Kiprə qarşı türkdilli dövlətlərin birgə iradəsini ortaya qoyar və yeni diplomatik reallıqların formalaşmasına səbəb olar. Azərbaycan kimi strateji əhəmiyyətə malik ölkənin bu məsələdə açıq dəstək verməsi beynəlxalq diqqəti Türk birliyinin artan gücünə yönəldəcəkdir".
Ləman Həsənova
16:49 01.05.2025
Oxunuş sayı: 3222
