Ermənistan anlamalıdır ki, Azərbaycanla münasibətlərin normallaşması sayəsində iqtisadi imkanlar əldə edə bilər - Deputat
Ermənistan regionda yeni tranzit mərhələsinə qədəm qoyur. Baş nazir Nikol Paşinyan hökumətin iclasında bildirib ki, ölkə Azərbaycandan Türkiyəyə və əks istiqamətdə avtomobil yolu ilə yüklərin tranzitini təmin etməyə tam hazırdır. Paşinyanın sözlərinə görə, bu addım Vaşinqton razılaşmasının həyata keçirilməsi baxımından mühüm mərhələ hesab olunur. O həmçinin Rusiya buğdasının Azərbaycan üzərindən Ermənistana daşınmasını “tarixi hadisə” adlandıraraq, regionda yeni nəqliyyat marşrutlarının formalaşdığını vurğulayıb.
Məsələ ilə bağlı Milli Məclisin deputatı Könül Nurullayeva fikirlərini Crossmedia.az-la bölüşüb. O bildirib ki, Cənubi Qafqazda tranzit məhdudiyyətlərinin aradan qaldırılması əməkdaşlıq mühiti üçün əlverişli imkanlar yaradır: “Bununla bağlı ilk addım da Azərbaycandan gəlib. Məlum olduğu kimi, cənab Prezident Qazaxıstanda səfərdə olarkən ölkəmizin Ermənistana belə bir güzəşt etdiyini açıqladı. Bunun ardınca Ermənistan da Azərbaycan və Türkiyəyə yeni marşrut təklif etdi. Artıq Qazaxıstandan, Rusiyadan gələn yük qatarları Azərbaycandan keçməklə Ermənistana çatır”.
Deputatın dediyinə görə Azərbaycan və Türkiyə ilə sərhədlərin 30 ildən çoxdur bağlı qalması Ermənistanın ticarət və logistik imkanlarını məhdudlaşdırıb: "Buna görə də Azərbaycan üzərindən tranzitin açılması Ermənistan üçün “nəfəslik” deməkdir. Ermənistanın baş naziri Nikol Paşinyan da Azərbaycan Prezidentinə bu güzəştə görə təşəkkür etdi. İrəvanda bu, Ermənistan blokadasının aradan qaldırılmasının ilk mərhələsi hesab edilir. Biz tranzit məhdudiyyətlərinin aradan qaldırılmasını kommunikasiyaların açılmasının praktik mərhələyə qədəm qoyması kimi qiymətləndirə bilərik. Çünki Azərbaycan, Gürcüstan və Türkiyə üzərindən keçən dəhlizlərin fəaliyyəti Cənubi Qafqazda iqtisadi və logistika imnkanlarının genişlənməsi deməkdir. Lakin istənilən halda Zəngəzur dəhlizi (TRİPP) tez bir zamanda reallaşmalıdır. Ermənistan tərəfi ABŞ ilə TRIPP layihəsinin həyata keçirilməsi istiqamətində intensiv iş aparıldığını söyləsə də hələ ki, real addımlar gözə dəymir. Əslində Ermənistan anlamalıdır ki, Azərbaycanla münasibətlərin normallaşması sayəsində bir çox iqtisadi imkanlar əldə edə bilər. Prezident İlham Əliyev də bəyan edib ki, tranzit imkanlarından düzgün istifadə edilməlidir. Bu, Ermənistanın özünə də hava və su kimi lazımdır”.
Fidan Qarayeva
18:15 07.11.2025
Oxunuş sayı: 1618
