Tbilisidə azərbaycanlılara qarşı zorakılıq təşkil edən qadının ittihamları ağırlaşdırıla bilər
Tbilisidə supermarketdə çalışan iki azərbaycanlı gəncə qarşı qrup halında zorakılığın təşkilində və ona rəhbərlik etməkdə ittiham olunan Manana Giorqobiani ilə bağlı etnik zəmində mümkün cinayət törətmək faktı üzrə də istintaq aparılır.
Crossmedia.az xəbər verir ki, bu barədə prokuror Giorgi Dolakidze bildirib.
Onun sözlərinə görə, faktla bağlı sübutlar toplanır və müvafiq hüquqi qiymətləndirmə veriləcək.
“Giorqobianiyə qarşı irəli sürülmüş ittihamların ağırlaşdırılacağı istisna edilmir”, - prokuror əlavə edib.
Dolakidze deyib ki, Giorqobiani istintaqla əməkdaşlıqdan imtina edib, ifadələr verməyib və ona psixiatrik ekspertiza təyin olunub.
Qeyd edək ki, Tbilisi Şəhər Məhkəməsi bu gün Giorqobiani barəsində həbs qətimkan tədbiri seçib. Hadisə ilə bağlı videogörüntülərdən məlum olur ki, o, mağazanın əməkdaşları olan azərbaycanlılara qarşı etnik zəmində müəyyən təhqiramiz ifadələr işlədib.
Faktla bağlı Giorqobianidən başqa daha 5 nəfər saxlanılıb. Beş nəfər barəsində də məhkəmə həbs qətimkan tədbiri seçib. Günahları sübuta yetiriləcəyi halda onlar 9 ilədək həbs cəzası ala bilərlər.(APA)
14:08
Tbilisidə supermarketdə çalışan iki azərbaycanlı gəncə qarşı qrup halında zorakılığın təşkilində və ona rəhbərlik etməkdə ittiham olunan Manana Giorqobiani barəsində həbs qətimkan tədbiri seçilib.
Crossmedia.az xəbər verir ki, bu barədə qərarı Tbilisi Şəhər Məhkəməsi qəbul edib.
Vəkilinin sözlərinə görə, Giorqobiani üçün psixoloji və psixiatrik ekspertiza təyin edilib. O, saxlanılandan sonra psixiatriya müəssisəsinə aparılıb və oradan da məhkəməyə gətirilib.
Müdafiə tərəfi Giorqobiani barəsində 5 min lari məbləğində girov qətimkan tədbirinin seçilməsini tələb edib.
Gürcüstanın Baş Prokurorluğunun məlumatına əsasən, Giorqobiani mağaza əməkdaşlarından pul tələb edib, imtina alandan sonra özünü aqressiv aparıb. O, supermarket işçilərini təhqir edib, onlardan birinə fiziki zor tətbiq edib və hər ikisini ölümlə hədələyib. Mağazanı tərk edəndən sonra o, qrup halında zorakılıq təşkil edib.
Faktla bağlı saxlanılmış digər 5 nəfər qrup halında zorakılıqda iştirakda ittiham olunur. Onlardan birinin yaşayış evinin zirzəmisində saxlanılan və qanunsuz əldə edilmiş iki ədəd “Kalaşnikov” avtomatı və 110 ədəd patron götürülüb. Həmin şəxslərin də məhkəməsi bu gün keçiriləcək. Törədilmiş cinayət əməlinə görə 9 ilədək həbs cəzası nəzərdə tutulur.
Qeyd edək ki, hadisə noyabrın 2-də gecə saatlarında baş verib. Zorakılığa məruz qalmış 19 və 21 yaşlı gənclər Dmanisi və Qaraçöp bölgəsindəndir.(APA)
11:03
Tbilisidə supermarketdə çalışan iki azərbaycanlı gəncə qarşı qrup halında zorakılıq törətməkdə ittiham olunan daha bir nəfər – 1997-ci il təvəllüdlü Ş.A. adlı şəxs saxlanılıb.
Crossmedia.az xəbər verir ki, bu barədə Gürcüstanın Daxili İşlər Nazirliyindən bildirilib.
Məlumata əsasən, cinayəti törədən bütün şəxslər müəyyən edilərək təqsirləndirilən şəxs qismində saxlanılıb. Cinayət əməli 9 ilədək müddətə azadlıqdan məhrum etmə ilə cəzalandırılır.
Faktla bağlı istintaq davam etdirilir.
Qeyd edək ki, hadisə noyabrın 2-də gecə saatlarında baş verib. 2006 və 2004-cü il təvəllüdlü soydaşlarımıza qarşı qrup halında zorakılığın təşkili və iştirakında ittiham olunan Manana Giorqobiani noyabrın 5-də, digər 4 nəfər isə ötən gün saxlanılıb.
Gürcüstanın Baş Prokurorluğu Manana Giorqobianiyə qarşı rəsmi ittiham irəli sürüb, onun barəsində həbs qətimkan tədbirinin seçilməsi üçün vəsatətlə məhkəməyə müraciət edəcək.(APA)
19:30 07.11.2025
Oxunuş sayı: 1280
