Nüvə müharibəsi ehtimalı: "Pakistana qarşı hərbi müdaxilə genişlənə bilər"
Pakistan – Hindistan sərhədində yenidən atışma baş verib. Pakistan hərbçiləri tərəfindən Hindistanın Cəmmu və Kəşmir ittifaq ərazisinin bir neçə rayonunda nəzarət xəttində yenidən atəş açılıb.
Aprelin 29-dan 30-dək Pakistan ordusunun postları Cəmmu və Kəşmir ittifaq ərazisindəki Nauşera, Sunderbani və Ahnur sektorları qarşısında nəzarət xətti boyunca atıcı silahlardan atəş açıblar. Hindistan ordusu qüvvələri tez və mütənasib şəkildə cavab veriblər.
Pakistan - Hindistan arasında yenidən baş verən gərginlik barədə Crossmedia.az saytına açıqlama verən politoloq Məhəmməd Əsədullazadənin sözlərinə görə, əgər Pakistanla Hindistan arasında müharibə baş versə, bu, iki tərəf arasında dördüncü müharibə olacaq: "BMT-nin qətnamələri əsasən Pakistanın xeyrinədir. Lakin Hindistan Cəmmu və Kəşmiri işğal altında saxlayır. Burada Çin faktoru da nəzərə alınmalıdır. Belə ki, Çin birinci Pakistan–Hindistan müharibəsi zamanı Cəmmu və Kəşmirin bir hissəsinin nəzarətini ələ keçirib. Hazırda Hindistanda hakimiyyətdə olan baş nazir Narendra Modi başçılığındakı millətçi hökumətin həm Pakistana, həm də ölkədəki müsəlmanlara qarşı sərt və radikal siyasət yeritdiyi açıq şəkildə görünür. Yeni dünya siyasi nizamı formalaşmaq üzrədir və Hindistan Cənub-Şərqi Asiyada öz geosiyasi mövqeyini gücləndirməyə çalışır. Çin–Pakistan ittifaqına qarşı Hindistan öz hərbi imkanlarından istifadə edərək Pakistana qarşı hərbi müdaxiləni genişləndirə bilər".
Müsahibimiz Kəşmirdə baş vermiş terror hücumunun arxasında Hindistanın da iştirakını istisna etmədiyini söyləyib: "Bu hücum bəhanə kimi istifadə edilərək Pakistana qarşı genişmiqyaslı hərbi əməliyyatların başlanması ehtimalı var. Hindistan resurs baxımından Pakistandan daha üstündür və Modi hökuməti düşünür ki, əgər Pakistan üzərində siyasi, psixoloji və hərbi üstünlük əldə etsə, bu, Çin–Pakistan ittifaqını zəiflədər və Hindistanın beynəlxalq nüfuzunu artıraraq regionda güc mərkəzinə çevrilməsinə xidmət edər. Bu da ehtimal xaricində deyil və görünür ki, Hindistan bu plan üzərində çalışır. Lakin hər üç ölkənin güclü hərbi potensialı, o cümlədən nüvə silahları mövcuddur. Əgər müharibə genişlənərsə və tərəflər öz mövcudluqlarını qorumaq məqsədilə nüvə silahına əl atmazlarsa, yalnız bu halda tammiqyaslı qarşıdurmadan yayınmaq mümkün ola bilər. Görürük ki, yeni dünya siyasi düzənində Hindistan beynəlxalq güc mərkəzinə çevrilmək üçün resurslarından istifadə edərək ön plana çıxmağa çalışır. Bu kontekstdə Pakistan daha zəif tərəf kimi görünür. Obyektiv baxışla bu terror aktında Pakistanın maraqlı olmadığını demək olar. Hindistan isə Çin–Pakistan ittifaqını pozmaq və Pakistanı zəiflətmək məqsədilə bu tip əməliyyatlara başlamaqda israrlıdır".
Politoloqun sözlərinə görə, Modi hökuməti artıq Təhlükəsizlik Şurasının iclasını keçirib və hərbçilərə Pakistana dair sərbəst fəaliyyət göstərə bilmələri ilə bağlı təlimat verib: "Beləliklə, Hindistan ordusu Ali Baş Komandanın əmrini gözləmədən Pakistana qarşı əməliyyatları genişləndirə və hücumları intensivləşdirə bilər. Digər tərəfdən, Pakistan ordusu da kifayət qədər güclüdür. Türkiyə və Çin amilləri də nəzərə alınmalıdır. Çin artıq bu məsələyə dair açıqlama verib. Genişmiqyaslı müharibə ehtimalı azdır, lakin lokal toqquşmaların və sərhəd insidentlərinin intensivləşməsi mümkündür. Əgər münaqişə böyüsə, bu, Çin üçün ciddi strateji narahatlıq yaradacaq. Çin regionda əsas güc mərkəzlərindən biri kimi, Hindistanın Pakistan üzərində qələbə qazanmasına və ya Pakistanın bəzi ərazilərini işğal etməsinə imkan vermək istəməz".
Pərvin Hacıyeva
16:58 30.04.2025
Oxunuş sayı: 1022
