İran Azərbaycanın imkanlarını qiymətləndirir: "Münasibətlər inkişaf edəcək"
İran Prezidenti Məsud Pezeşkian Azərbaycan Televiziyasına (AzTV) verdiyi müsahibədə iki ölkə arasındakı münasibətlərə, gələcəkdə atıla biləcək addımlara dair fikirlərini bölüşüb. O, çıxışı zamanı vurğulayıb ki, İran hər zaman Azərbaycanın hüquqlarını müdafiə edib. Burada sual yaranır: Prezident Pezeşkianın müdafiə etdiyini bildirdiyi "Azərbaycanın hüquqları" dedikdə konkret olaraq hansı məsələlər nəzərdə tutulur? Bu müdafiəni zəruri edən səbəblər nədən ibarət idi?
İran liderinin verdiyi mesajlar barədə Crossmedia.az-a danışan Milli Məclisin deputatı Aydın Hüseynov söyləyib ki, Bakı ilə Tehran arasında diplomatik münasibətlərin zəngin tarixi keçmişi var: "İki xalqın din, mədəniyyət, mənəvi dəyərlər baxımından yaxınlığı, eyni zamanda, ortaq tarixə malik olması dövlətlərarası əlaqələrin inkişafına müsbət dinamika verir. Azərbaycan Xalq Cümhuriyyəti dövründə bir sıra mürəkkəb problemlərə və ciddi maneələrə baxmayaraq, iki ölkə arasında diplomatik münasibətlərin qurulmasına nail olunmuşdu. Azərbaycanla İran arasında birbaşa əlaqələrin yenidən qurulmasına SSRİ-nin süqutundan bir qədər əvvəl başlanılmışdı. Azərbaycanın xarici siyasətində İranlza əlaqələr həmişə başlıca yerlərdən birini tutub”.
A.Hüseynov, həmçinin qeyd edib ki, iki ölkə arasında münasibətlərin 30 illik tarixində eniş-yoxuşlar dövrü də olub: "Azərbaycan İranla münasibətlərin normal olmasında maraqlıdır. Təkcə ona görə yox ki, bu ölkənin milyonlarla yerli sakini azərbaycanlı, Azərbaycan türküdür, həm də Azərbaycan İrana qonşudur. Qonşularla dinc yanaşı yaşamaq vacibdir. Rəsmi Bakı qonşularla dinc yanaşı yaşamaq prinsipinə daim əməl edir. Azərbaycan və İran prezidentlərinin iştirakı ilə ötən ilin yazında “Xudafərin” hidroqovşağının istismara verilməsi və “Qız Qalası” hidroqovşağının açılış mərasiminin keçirilməsi hadisəsi buna nümunə sayıla bilər. Bu il yanvarın 22-23-də Tehranda İran – Azərbaycan Birgə İqtisadi Komissiyasının 16-cı iclası keçirilib. İkitərəfli əməkdaşlığa dair məsələlər müzakirə olunub və memorandum imzalanıb. Həm Azərbaycan, həm də İran ərazisindəki Astara terminalları Şimal-Cənub dəhlizi üzrə artan yükaşırma həcmlərinin daha sürətli və effektiv həyata keçirilməsinə, dəhlizin strateji potensialının reallaşdırılmasına, eləcə də Azərbaycanın və İranın nəqliyyat infrastrukturunun gücləndirilməsinə imkan verir. Rusiya və İran arasında Azərbaycan ərazisindən keçəcək yeni qaz kəməri barədə rəsmi razılıq əldə edilib. İki ölkə arasında münasibətlərin daha da inkişaf edəcəyini İran prezidenti Məsud Pezeşkiyanın Azərbaycana səfəri ilə də proqnozlaşdırmaq olar. Azərbaycan Cənubi Qafqazın aparıcı ölkəsidir, bütün regional layihələrin müəllifidir. Ölkəmizin beynəlxalq səviyyədə çəkisi, nüfuzu getdikcə artır. İran rəhbərliyi Azərbaycanın imkanlarını, statusunu dəyərləndirməmiş deyil”.
Ayhan Ağarzayev
15:44 28.04.2025
Oxunuş sayı: 7881
