Xarici xəbərlər

İtaliya: Beynəlxalq Cinayət Məhkəməsinin Putin haqqında həbs qərarı ölkədə qüvvəyə minməyib

İtaliya mətbuatının məlumatına görə, Beynəlxalq Cinayət Məhkəməsinin Rusiya Prezidenti Vladimir Putin barəsində çıxardığı həbs qərarı ölkədə hüquqi qüvvəyə malik deyil.

Crossmedia.az İtaliya mətbuatına istinadən xəbər verir ki, “Corriere della Sera” və “La Repubblica” qəzetlərinin yazdığına əsasən, İtaliyanın ədliyyə naziri sözügedən qərarı yerli məhkəməyə təqdim etməyib və buna görə də sənəd ölkədə icraya yönəldilməyib.

Rəsmi Roma bununla bağlı əvvəlki mövqeyini əsas götürür. Belə ki, İtaliya hakimiyyəti BMT-nin qəbul etdiyi Vyana Konvensiyasına istinad edərək, xarici ölkə liderlərinin, o cümlədən dövlət başçılarının İtaliya ərazisində toxunulmazlıq hüququna malik olduqlarını bəyan etmişdi.

Qeyd edək ki, Beynəlxalq Cinayət Məhkəməsi Vladimir Putini Ukrayna ərazisindən uşaqların qanunsuz şəkildə Rusiya Federasiyasına aparılmasında məsuliyyətli şəxs kimi tanıyaraq, onun barəsində həbs qərarı çıxarmışdı. Lakin bir sıra dövlətlər, o cümlədən Rusiya və bir neçə Avropa ölkəsi bu qərarın hüquqi və siyasi baxımdan mübahisəli olduğunu bildirir.

İtaliyanın bu addımı qərarın beynəlxalq miqyasda icrası ilə bağlı çətinlikləri və siyasi faktorların hüquqi mexanizmlərə təsirini bir daha gündəmə gətirib.

Mədinə Cəlilova

🖨 Çap et

20:15 24.04.2025

Oxunuş sayı: 751