Ersin Tatar: Azərbaycanın və Türkiyənin dəstəyi Şimali Kiprin sabitliyi və inkişafı üçün vacibdir
Şimali Kipr Türk Cümhuriyyətinin (ŞKTC) hər bir sakini üçün Azərbaycan, Türkiyədən heç də az əhəmiyyət daşımır. Biz Prezident İlham Əliyevin Kipr türk xalqına göstərdiyi diqqətə səmimi qəlbdən minnətdarıq və bunu yüksək qiymətləndiririk. Bunu ŞKTC Prezidenti Ersin Tatar Türk Dünyası Novruz Festivalının bağlanış mərasimində çıxış edərək bildirib.
Onun sözlərinə görə, ŞKTC rəhbərliyinin Azərbaycanda keçirilən mühüm tədbirlərə dəvət olunması Lefkoşanın beynəlxalq mövqelərinin möhkəmləndirilməsi istiqamətində mühüm addım olub.
Ersin Tatar qeyd edib ki, Lefkoşa "Bir millət, üç dövlət" prinsipi çərçivəsində Ankara və Bakı ilə dialoqu gələcəkdə də dərinləşdirəcək.
"Qardaş ölkələrin dəstəyi Şimali Kiprin sabitliyi və inkişafı üçün vacibdir. Ölkəmiz gələcəyə inamla baxır", - deyən E.Tatar Türk Kiprinin müstəqilliyini və azadlığını müdafiəyə davam edəcəklərini vurğulayıb.
Prezident bildirib ki, ŞKTC-də Novruz bayramına həsr olunmuş tədbirlər gələcəkdə də geniş şəkildə qeyd ediləcək. (Azərtac)
09:55 24.03.2025
Oxunuş sayı: 2142
