Deputat: "Azərbaycan Xocalı faciəsinin beynəlxalq səviyyədə tanınması üçün diplomatik addımlar atır"
Azərbaycan Xocalı soyqırımına hüquqi qiymət verilməsi və bu faciənin günahkarlarının məsuliyyətə cəlb olunması istiqamətində səylərini davam etdirəcək.
Crossmedia.az xəbər verir ki, bunu Milli Məclisin deputatı Pərvanə Vəliyeva Keniya KİV-inə müsahibəsində deyib.
"Azərbaycan xalqı Xocalı soyqırımını heç vaxt unutmayacaq. Unutmaq bu kimi dəhşətlərin təkrarlanmasına səbəb ola bilər. Buna görə də səyləri davam etdirmək və Xocalı soyqırımı ilə bağlı həqiqətləri beynəlxalq ictimaiyyətə çatdırmaq lazımdır", - o vurğulayıb.
Deputat qeyd edib ki, Azərbaycan hökuməti bu faciənin beynəlxalq səviyyədə tanınmasına nail olmaq üçün fəal hüquqi və diplomatik addımlar atır. Onun sözlərinə görə, diplomatik səylər sayəsində artıq bir sıra ölkələr Xocalı soyqırımını rəsmən tanıyıb.
P.Vəliyeva eyni zamanda beynəlxalq ictimaiyyətin Xocalı soyqırımına reaksiyasını qeyri-kafi adlandırıb. O əlavə edib ki, bir çox ölkələr və beynəlxalq təşkilatlar bu çərçivədə lazımi tədbirlər görməyib, bəziləri hətta Ermənistanın amansız cinayətlərinə göz yumub.
Deputatın sözlərinə görə, Azərbaycan Xocalı soyqırımının günahkarlarının məsuliyyətə cəlb edilməsində qətiyyətlidir və bu məsələni beynəlxalq səviyyədə qaldırmağa davam edəcək.
16:14 27.02.2025
Oxunuş sayı: 7094
