Türkiyə ictimaiyyəti: Xocalı soyqırımını unutmayacağıq
İstanbulda “Əsrin soyqırımı Xocalını unutmadıq, unutdurmayacağıq” mövzusunda konfrans keçirilib. Tədbir Türkiyə-Azərbaycan Dərnəkləri Federasiyası (TADEF), İstanbul Türkiyə-Azərbaycan Dərnəyi (İSTAD) və şəhərin Kadıköy bələdiyyəsinin birgə təşkilatçılığı ilə reallaşıb.
Tədbir iştirakçıları əvvəlcə konfransın keçirildiyi Kozyatağı Mədəniyyət Mərkəzində açılan Xocalı soyqırımını əks etdirən fotoşəkillərdən ibarət sərgiyə baxış keçiriblər.
Konfrans Azərbaycan və Türkiyənin Dövlət himnləri səsləndirilməsi, hər iki ölkənin şəhidlərinin xatirəsinin “Qurani-Kərim”dən ayələrin oxunması ilə başlayıb.
Açılış mərasimində çıxış edən TADEF-in rəhbəri Ədalət Turan, İSTAD-ın sədri Səfər Qaraqoyunlu, Azərbaycanın İstanbuldakı Baş konsulluğunun konsulu Kənan Abbasov, Türk Mədəniyyət Platformasının rəhbəri, tədqiqatçı-yazıçı Metin Yıldırım və Türkiyə ictimaiyyətinin nümayəndələri Azərbaycanın Vətən müharibəsində əldə etdiyi şanlı Zəfərinin Xocalı və bu kimi bir çox soyqırımı cinayətlərinə ən gözəl cavabəı olduğunu, hazırda Türk dünyasının bu vəhşiliyi törədənlərin ən ağır cəza ilə cəzalandırılmasını tələb etdiyini bildiriblər.
Natiqlər işğaldan azad olunmuş Xocalıya etdikləri səfər barədə danışaraq bildiriblər ki, ermənilər illər boyu bu torpaqlarda meyvə-tərəvəz yerinə mina “əkiblər”, Yer üzündəki heç bir insan öz doğma torpağına bu cür qərəzli münasibət bəsləyə bilməz. Elə bu fakt özü-özlüyündə ermənilərin bu ərazilərə heç bir aidiyyətinin olmadığına ən böyük sübutdur. Azərbaycan isə bunun tam əksinə minaları təmizləməklə yanaşı, qısa vaxt ərzində Qarabağı yenidən cənnətə çevirərək oraların əsl sahiblərinin kimin olduğunu bütün dünyaya göstərdi.
Çıxışlarda tarixi bağlarla bir-birinə düyünlənən Türkiyə-Azərbaycan münasibətlərinə toxunulub, iki ölkə arasındakı qardaşlığın tarixin müxtəlif dövrlərində yaşanan sevincdə də, kədərdə də daima özünü göstərdiyi vurğulanıb.
Konfrans panel iclasla davam etdirilib.
Metin Yıldırımın moderatorluğu ilə keçirilən paneldə Beykoz Universitetinin prorektoru, Diplomatiya Araşdırmaları Dərnəyinin rəhbəri, professor Raqıp Kutay Karaca, Marmara Universitetinin professoru Vüqar İmambəyli və tarixçi-yazıçı Mehmet Dağıstanlının Xocalı soyqırımı ilə bağlı məruzələri dinlənilib.
Tədbirin bədii hissəsində proqramın tərtibatçısı, “TRT Türkü” radiosunda yayımlanan “Azərbaycan rüzgarı” proqramının müəllifi və aparıcısı Səidə Ömərin ifasında Xocalıya həsr olunan seir kompozisiyası dinlənilib. (Azərtac)
08:31 25.02.2025
Oxunuş sayı: 2708
