Deputat Azərbaycan - Pakistan münasibətlərini fərqləndirən əsas xüsusiyyəti açıqladı
Azərbaycanla Pakistan arasında əlaqələr son zamanlar yeni əməkdaşlıq müstəvilərini əhatə etməkdədir. İkitərəfli əməkdaşlıqdakı müsbət dinamika özünü bütün sahələrdə, o cümlədən müdafiə sənayesi sahəsində göstərir.
Bakı ilə İslamabad arasında münasibətlərin inkişafı, əlbəttə, hər iki tərəfin marağındadır. Faktiki olaraq strateji tərəfdaşlıq səviyyəsində olan münasibətlərin genişləndirilməsi indiki geosiyasi şəraitdə hər iki tərəf üçün vacibdir.
İkitərəfli münasibətlərin hazırkı durumu barədə Crossmedia.az-a danışan Milli Məclisin deputatı Rizvan Nəbiyevin fikrincə, Azərbaycan və Pakistan arasındakı münasibətləri fərqləndirən əsas xüsusiyyət ondan ibarətdir ki, bu əlaqələr həm möhkəm fundament üzərində qurulub, həm də çoxşaxəlidir: "Bu təməl Azərbaycanın müstəqilliyinin ilk günlərindən formalaşıb. Azərbaycan və Pakistan arasındakı tarixi dostluq və qardaşlıq əlaqələri dərin köklərə malikdir. İki ölkə arasında diplomatik münasibətlər Azərbaycanın müstəqilliyini elan etməsindən qısa müddət sonra, 1992-ci ilin iyun ayında qurulmuş və bu əlaqələr həmin vaxtdan yüksək səviyyədə və pozitiv dinamika ilə inkişaf etməkdədir".
Parlamentari bildirib ki, Azərbaycanın müstəqilliyini qardaş Türkiyədən sonra ilk tanıyan ikinci dövlət Pakistan olub, bu Sovetlər İttifaqının dağılmasından əvvəl 1991-ci il dekabrın 12-də baş vermişdir: "Həmçinin, torpaqlarımız işğal altında olduğu müddətdə Pakistan Ermənistanla diplomatik münasibətlər qurmayıb və bu gün də belə az saylı dövlətlərdəndir. İslamabadın bu qardaşlıq və beynəlxalq hüquqa əsaslanan dəstəyi Azərbaycan-Pakistan münasibətlərinin formalaşmasına mühüm töhfə verir. Xüsusilə, Vətən müharibəsi dövründə Pakistanın həmrəyliyi və siyasi dəstəyi hər zaman hiss olunub".
Deputat qeyd edib ki, bu münasibətlərin uğurlu inkişafını xarakterizə edən digər məqam isə Azərbaycan Prezidenti ilə Pakistanın siyasi rəhbərliyi arasındakı səmimi və qarşılıqlı maraq doğuran bütün məsələləri əhatə edən dialoqun olmasıdır: "Dövlət başçıları arasında qurulan bu yaxın əlaqələr, təbii ki, münasibətlərin müsbət məcrada inkişafına ciddi təsir göstərir. Dövlət rəhbərləri səviyyəsində mütəmadi səfərlər mübadiləsi həyata keçirilir. Məsələn, bu günlərdə Pakistan Senatının sədri Azərbaycana səfər edib və Bakıda keçirilən Asiya Parlament Assambleyasının XV plenar iclası çərçivəsində çıxış edib. O, çıxışında beynəlxalq münasibətlər sistemində multilateralizmin, çoxşaxəliliyin və çoxqütblülüyün möhkəmləndirilməsində parlament diplomatiyasının rolu barədə danışıb. O, həm Azərbaycan parlamentinin sədri, həm də Azərbaycan Respublikasının Prezidentilə iki tərəfli görüşlər keçirib. Bu da bir daha sübut edir ki, Azərbaycan və Pakistan arasındakı münasibətlər həm ikitərəfli, həm də çoxtərəfli formatda, o cümlədən beynəlxalq təşkilatlar çərçivəsində uğurla inkişaf edir. İslam Əməkdaşlıq Təşkilatı, İqtisadi Əməkdaşlıq Təşkilatı, Asiya Parlament Assambleyası və BMT çərçivəsində də iki ölkə arasında əməkdaşlıq uğurla davam etdirilir. Bundan əlavə, Azərbaycan-Türkiyə-Pakistan formatında müxtəlif sahələr üzrə əməkdaşlıq da genişləndirilir və bu formatın böyük perspektivləri var".
Xumar Əhmədova
11:44 22.02.2025
Oxunuş sayı: 17659
