Qərbi Azərbaycan Pakistan mediasının da diqqətindədir - TƏBLİĞAT GENİŞLƏNİR
Dünya mediasi Qərbi Azərbaycan məsələsinə xüsusi diqqət göstərməkdədir. Xüsusən qardaş Pakistanın mətbuat orqanları da zaman-zaman Qərbi Azərbaycan mövzusuna müraciət edirlər.
Crossmedia.az olaraq Pakistanın Daily Islamabad Post qəzetinin bu mövzuda yazdığı məqaləni diqqətinizə təqdim edirik:
"Qanuni və layiqli həyat hüququ insanın fundamental haqqıdır və beynəlxalq hüquqi aktlarla müəyyən edilmişdir. İnsanlıq tərəfindən əldə edilən irəliləyişlərə baxmayaraq, Ermənistandan qəddarcasına qovulmuş Qərbi azərbaycanlıların bu haqqı hələ də bərpa olunmayıb. Bu məsələ beynəlxalq hüquq çərçivəsində həllini tapmalıdır.
Azərbaycan hökuməti beynəlxalq təşkilatlardan ədalətli yanaşma tələb edir. Lakin məqalədə qeyd edilir ki, insan haqları mövzusunda həssas olan dünya birliyi Qərbi azərbaycanlıların vəziyyəti ilə bağlı susmağa davam edir. Bu susqunluq və vahid yanaşmanın olmaması bir çox suallar doğurur.
Azərbaycan bu məsələni həll etmək üçün tarixi araşdırmalar, beynəlxalq təşəbbüslər və diplomatiyanı əhatə edən çoxşaxəli yanaşma tətbiq edir. Bu istiqamətdə atılan əsas addımlardan biri Qərbi Azərbaycan İcmasının yaradılmasıdır. İcma, hüquqları tapdanmış yarım milyondan çox insanın problemlərinə beynəlxalq təşkilatların, insan haqları institutlarının və geniş ictimaiyyətin diqqətini çəkməyi hədəfləyir.
Azərbaycan vurğulayır ki, Qərbi azərbaycanlıların öz tarixi torpaqlarına qayıtmaq haqqı onların ayrılmaz hüququdur".
Belə ki, Pakistan qəzeti Ümumdünya İnsan Hüquqları Bəyannaməsinin 13-cü maddəsinin 2-ci bəndinə istinad edərək, həmin maddənin insanlara öz vətənlərinə qayıtmaq və məcburi köçürülmədən müdafiə olunmaq hüququnu verdiyini bildirir. Yazıda qeyd olunur ki, bu insanların çəkdiyi əzablar heç nə ilə kompensasiya edilə bilməz və bu haqsızlığın yeganə həlli ədalətin bərqərar olmasıdır.
Öz doğma yurdlarından qovulmuş Qərbi azərbaycanlılar ədalət uğrunda mübarizəni dayandırmırlar. 2020-ci il müharibəsinin başa çatması və işğalın aradan qaldırılması onların beynəlxalq hüquq və qanunvericilik çərçivəsində sülh yolu ilə qayıdış ümidlərini gücləndirib.
Azərbaycan Ermənistandan Qərbi azərbaycanlıların öz evlərinə qayıtmaq hüququnun tanınmasını, onların təhlükəsizliyinin təmin edilməsini, infrastrukturun bərpa olunmasını və normal həyat üçün şərait yaradılmasını gözləyir. Məqalədə qeyd olunur ki, repatriasiya üçün heç bir maneə yoxdur, çünki Qərbi azərbaycanlılara məxsus evlər bu gün də boşdur. Ermənistan tarixdə törətdiyi bu haqsızlığa görə üzr istəməli və insanların layiqli qayıdışını təmin etməlidir.
Qeyd edək ki, ədalət təkcə bir şüar deyil, beynəlxalq münasibətlərin əsas prinsipidir. Qərbi azərbaycanlılar təkcə öz doğma torpaqlarına qayıtmaq hüququna deyil, həm də orada layiqli həyat sürmək haqqına sahibdirlər.
Fatimə Məmmədova
20:46 21.02.2025
Oxunuş sayı: 11987
