Hərb, ya sülh? - "Ermənistan hakimiyyəti ağıllı davranmalıdır"
Milli Məclis sədrinin müavini Ziyafət Əsgərov “Yüksəliş” müsabiqəsi tərəfindən keçirilən “Gələcəyə baxış: Yeni reallıqlar şəraitində suverenliyin möhkəmləndirilməsi” forumunda iştirakçıların suallarını cavablandırarkən deyib ki, sülh müqaviləsinin imzalanmaması Ermənistanın manipulyasiyalarının nəticəsidir.
Onun sözlərinə görə, rəsmi İrəvan ilk əvvəllər "5 baza prinsipi"ni qəbul etmişdi:
“Amma sonra cığallıq etməyə başladılar. Ermənistan müstəqil, suveren dövlət olmadığından Bayden administrasiyasının təzyiqi ilə sülh müqaviləsini ertələdi. Artıq 17 bəndlik müqavilənin 15 bəndi razılaşdırılıb. Onlardan biri Zəngəzur dəhlizinin açılmasıdır. Ermənistan bunun baş tutmamasını gah İran, gah Fransa, gah da ABŞ-nin üstünə atdı".
Z.Əsgərov əlavə edib ki, razılaşdırılmamış digər bənd Ermənistan konstitusiyasındakı ərazi iddiaları məsələsidir:
"Onların Müstəqillik Bəyannaməsində göstərilib ki, “Dağlıq Qarabağ” Ermənistan ərazisidir. Artıq Ermənistan rəsmiləri bəyan ediblər ki, yeni konstitusiya layihəsi hazırlanır. Nikol Paşinyan da dedi ki, ondan əvvəl edilən dəyişikliklər legitim sayıla bilməz. Biz isə müqaviləni baş nazirlə deyil, Ermənistan dövləti ilə imzalamaq istəyirik".
Bütün səylərə baxmayaraq, Cənubi Qafqazda hələ də sülh əldə olunmur. Bunun əsas günahkarı da, səbəbkarı məhz Ermənistandır. Belə ki, rəsmi İrəvan bütün imkanları ilə konstruktiv təmaslardan yayınır.
Bu barədə Crossmedia.az-a açıqlamasında Milli Məclisin deputatı Elnarə Akimova bildirib ki, Ermənistan sülh müqaviləsindən yayınmaq üçün hər dəfə müəyyən oyunlar ortaya atır: "Buna ın bariz nümunələrdən biri də binokl diplomatiyasıdır. Bu və ya digər meyillər birbaşa olaraq sülhdən yayınmağa hesablanıb. Bunun da arxasında təbii ki, qərb dairələri,- Azərbaycanı sevməyən bəzi Avropa dairələri dayanır. Çünki onlara sülh müqaviləsinin imzalanması sərf etmir. Onlar Cənubi Qafqazda xausun körüklənməsində, harmoniyanın pozulmasında maraqlıdırlar".
Deputat həmçinin bildirib ki, Azərbaycanın da səbri bir yerə qədərdir: "Ermənistan ağılllı davranmalıdır. Ermənistan hakikiyyəti heç olmasa yarandığı dövrdən bu günə qədər xalqını saldığı çətin vəziyyəti nəzərə almalı və sülh müqaviləsinə razılaşmalıdır. Hər dəfə özünə havadarlar axtarmaq, Fransa və digər qərb dövlətlərinə arxalanmaq Ermənistan üçün alternativ deyil".
Fidan Xəlilova
16:34 21.02.2025
Oxunuş sayı: 10953
