Səfir Azərbaycan və Ukrayna XİN rəhbərləri arasında aparılan danışıqları şərh edib
Azərbaycanın xarici işlər naziri Ceyhun Bayramov Ukraynanın xarici işlər nazirinin müavini Oleksandr Mişenko ilə təhlükəsizlik və diplomatik məsələləri müzakirə edib.
Crossmedia.az xəbər verir ki, bu barədə nazirliklərin nümayəndələri arasında dünən baş tutmuş görüşü şərh edən Ukraynanın Azərbaycandakı səfiri Yuri Qusevin “X” sosial şəbəkəsindəki paylaşımında bildirilib.
"Ukrayna və Azərbaycan strateji əlaqələri möhkəmləndirir! Təhlükəsizlik, enerji və diplomatiya ilə bağlı yüksək səviyyəli görüşlər və siyasi məsləhətləşmələr keçirilib. Biz göstərdiyi humanitar yardıma və davamlı dəstəyə görə Azərbaycana minnətdarıq", - səfir yazıb.
Ötən gün Azərbaycan Xarici İşlər Nazirliyi Ceyhun Bayramovla Oleksandr Mişenko arasında danışıqların aparılması barədə məlumat yayıb. Tərəflər görüş zamanı dövlətlərin suverenliyi, ərazi bütövlüyü və sərhədlərin toxunulmazlığına dair iki ölkə tərəfindən davamlı şəkildə nümayiş etdirilən mövqenin, habelə ölkələr arasında beynəlxalq hüququn fundamental prinsiplərinə və qarşılıqlı hörmətə əsaslanan münasibətlərin vacibliyini vurğulayıblar.
12:54 21.02.2025
Oxunuş sayı: 4699
