Bu il informasiya təhlükəsizliyinə dair strategiyanın icrasında ən mühüm ildir
2025-ci il “İnformasiya təhlükəsizliyi və kibertəhlükəsizliyə dair 2023 – 2027-ci illər üçün Strategiyası”nın həyata keçirilməsi üçün ən əhəmiyyətli il hesab edilir.
Crossmedia.az xəbər verir ki, bunu Xüsusi Rabitə və İnformasiya Təhlükəsizliyi Dövlət Xidmətinin rəis müavini Allahverən İsmayılov təmsil etdiyi qurumun Bakıda keçirdiyi “Dövlət Qurumları IT Rəhbərlərinin V Zirvə Toplantısı”nda bildirib.
"Məhz bu il Strategiyanın əksər bəndlərinin icrasının başa çatması və yaxud son mərhələdə olması bu sahədə görülən işləri və əldə olunan nəticələrin mühüm olmasını bildirir”,-deyə o qeyd edib.
Dövlət xidməti rəsmisi ötən il kritik informasiya infrastrukturlarının siyahısının təsdiq edilməsi və dövlət informasiya ehtiyatlarının mühafizəsi üçün yeni normativ-hüquqi bazanın hazırlanması kimi mühüm addımların atıldığını da xatırladıb.
"Bu Zirvə toplantısının məqsədi dövlət qurumlarında informasiya təhlükəsizliyi üzrə rəhbər heyətin təcrübə mübadiləsini təmin etmək, kibertəhlükəsizlik təhdidlərini birgə qiymətləndirmək və qurumlararası kommunikasiyanı gücləndirməkdir. Yalnız birgə əməkdaşlıqla bu təhdidləri effektiv aşmaq mümkündür. Bizim məqsədimiz yalnız dövlət qurumlarının kibertəhlükəsizliyini artırmaq deyil, həm də ölkəmizin informasiya təhlükəsizliyi ekosistemini birgə formalaşdırmaqdır”, - deyə o əlavə edib.
10:54 21.02.2025
Oxunuş sayı: 9689
