Türkiyə və Azərbaycan bu mövzuda birləşir – YENİLİKLƏR OLACAQ
Dezinformasiya müasir dövrün ən böyük problemlərindən biridir. Belə ki, dezinformasiya xəbəri saxtalaşdıraraq yalan məlumata çevirir. Nəticədə bu, internetdəki məlumatlara olan inamın və xəbərin təsir dairəsinin azalmasına səbəb olur. Bununla bağlı istər Azərbaycanda istərsə də xarici ölkələrdə müxtəlif tədbirlər görülür. Məsələn, Almaniya dezinformasiyaya qarşı mübarizədə "Şəbəkə Mühafizəsi Aktı"nı qəbul edib. Bu qanun, sosial şəbəkə platformalarını saxta xəbərlərin yayılmasının qarşısını almağa və istifadəçilərin şikayətlərinə sürətli cavab verməyə məcbur edir. Əgər platformalar bu öhdəlikləri yerinə yetirməsələr, onlara cərimələr tətbiq oluna bilər.
Ölkəmiz bu problemlə mübarizədə Türkiyə ilə gücünü birləşdirməyi, ortaq mövqedən çıxış etməyi, bu istiqamətdə çalışmalarını artırmağı hədəfləyir. Bəs bu addım dezinformasiyaya qarşı mübarizədə nə dərəcədə faydalıdır?
Crossmedia.az mövzu ilə bağlı Mətbuat Şurasının idarə heyətinin üzvü Müşfiq Ələsgərliyə müraciət edib. Ekspert bildirib ki, Azərbaycanla Türkiyə mediası arasında əməkdaşlığın qurulması və yüksək səviyyəyə çatdırılması həmişə arzu edilən bir hal olub: “Bunun gerçəkləşməsi üçün müxtəlif təkliflər verilib. Azərbaycan müstəqil dövlət olduqdan sonra Türkiyə mediası ilə əlaqələrin qurulması və təmin olunması üçün müxtəlif forumlar, müzakirələr və disputlar aparılıb. Nəhayət, iki qardaş ölkənin media qurumları arasında əməkdaşlığın təmin olunması üçün memorandum imzalanıb”.
Onun sözlərinə görə bu təşəbbüs uğurla həyata keçirilib: “Hər iki ölkənin media qurumlarının vahid informasiya cəbhəsindən çıxış etməsi, istərsə də bu media qurumları arasında təcrübə mübadiləsinin keçirilməsi və digər sahələrdə uğurlu işlərin ortaya qoyulması təmin olunub. Hesab edirəm ki, II Qarabağ müharibəsi zamanı Azərbaycanın haqlı səsini dünyaya çatdırmaq üçün informasiya savaşının dəf edilməsi ilə bağlı görülən işlərdə birinci yerdə Azərbaycan Prezidenti İlham Əliyevin xarici mediaya verdiyi açıqlamalar dayanırsa, ikinci yerdə Azərbaycan və Türkiyə mediasının fəaliyyəti dayanır. Onlar informasiya blokadasını sındırmaq, Azərbaycanın reallıqlarını dünyaya çatdırmaq üçün ciddi əməkdaşlıq və fəaliyyət göstərilmişdir. Əməkdaşlıq nəticəsində uğurlu nəticələr əldə edilib. Bu baxımdan Azərbaycan və Türkiyə mediasının vahid platformadan çıxış etməsi uğurlu bir addımdır və öz effektiv nəticələrini verir. Bu, təkcə informasiya savaş məsələsində deyil, həm də təcrübə mübadiləsi fonunda özünü göstərir”.
Mütəxəssis vurğulayıb ki, Azərbaycanın çoxsaylı jurnalistləri Türkiyə media qurumlarında təcrübə mübadiləsi keçib: “Bu əməkdaşlıq iki ölkənin informasiya təbliğatı, haqq səsinin dünyaya çatdırılması üçün effekt verdiyi kimi, həm də xalqların mədəni yaxınlaşmasını, tarixi və mədəni əlaqələrin xatırlanmasını təmin etmək üçün böyük önəm daşıyır. Media və sivil toplum quruluşlarının yaxınlaşması müasir dövrdə xalqların yaxınlaşması üçün ən yaxşı metodlardan biri kimi təqdim olunur. Dezinformasiya ilə mübarizədə Türkiyə uğurlu praktikaya sahibdir. Türkiyədə dezinformasiya ilə mücadilə üçün ayrıca bir qurum formalaşdırılmışdır. Bu qurum, medianın imkanlarından istifadə edərək Türkiyəyə qarşı aparılan dezinformasiyanın qarşısını alır və ciddi təsir göstərir. Hesab edirəm ki, Azərbaycan və Türkiyə mediasının ortaq dəyərləri birləşdirməsi hər iki dövlətin və xalqın informasiya savaşında, dezinformasiyanın aradan qaldırılmasında uğurlu nəticələr təmin edir”, - deyə fikrini yekunlaşdırıb.
Nəzrin Salmanova
10:05 21.02.2025
Oxunuş sayı: 32107
