Azərbaycan-Türkiyə qardaşlığı - Kahramanmaraşda inşa edilən həyat
Tarix boyu Azərbaycan və Türkiyə arasındakı dostluq və qardaşlıq əlaqələri bir çox sınaqlardan keçmiş, hər zaman möhkəm və sarsılmaz olmuşdur. Xüsusilə çətin anlarda iki qardaş xalq bir-birinə dəstək olmuş, bu bağlılıq əməldə öz təsdiqini tapmışdır. Türkiyədə baş vermiş zəlzələ də bu birlik və həmrəyliyin bariz nümunələrindən biri oldu. Baş vermiş zəlzələdən sonra Azərbaycan Türkiyənin Kahramanmaraş şəhərində öz vəsaiti hesabına qəsəbə salmağı öhdəsinə götürdü.
Məsələ ilə bağlı Milli Məclisin deputatı Aydın Mirzəzadə fikirlərini Crossmedia.az-la bölüşüb:
“Türkiyədə baş vermiş dağıdıcı zəlzələ təkcə türk xalqının deyil, Azərbaycan xalqının da dərin kədərinə səbəb oldu. Fəlakət baş verən andan etibarən Azərbaycandan qardaş ölkəyə böyük dəstək göstərildi. Türkiyəyə ilk yardım göndərən dövlətlərdən biri məhz Azərbaycan oldu və xilasedici qüvvələrin sayına görə türkiyəli mütəxəssislərdən sonra ikinci yerdə qərarlaşdı. Azərbaycan Prezidenti İlham Əliyev dəfələrlə Türkiyənin yanında olduğunu vurğulayaraq, zəlzələdən zərər çəkmiş bölgələrdə Azərbaycan tərəfindən yeni bir qəsəbənin salınacağını bildirdi. Bu layihə çərçivəsində inşa edilən yaşayış məntəqəsində həm zəlzələyə davamlı binalar tikilmiş, həm də insanların rahat yaşaması, istirahəti və işləməsi üçün hər cür şərait yaradılmışdır. Bu təşəbbüs bir daha sübut edir ki, Azərbaycan və Türkiyə arasındakı dostluq və qardaşlıq sadəcə sözlərdə deyil, real addımlarda özünü göstərir”.
Ayhan Ağarzayev
19:54 20.02.2025
Oxunuş sayı: 4070
