Tofiq Zülfüqarov: Diplomatik xidmətdə nizam- intizam gücləndirilir
Prezident İlham Əliyev diplomatik xidmətin tənzimlənməsi ilə bağlı yeni qanunu imzalayıb.
Sənədə əsasən, diplomatlar Azərbaycanın xarici siyasətini həyata keçirməli, milli maraqları qorumalı və dövlət orqanlarının beynəlxalq əlaqələrini əlaqələndirməlidirlər. Onlara siyasi partiyalara üzv olmaq, dini qurumların fəaliyyətində iştirak etmək, xarici vətəndaşlıq almaq, xarici maliyyə ilə səfərlərə getmək və bəzi hallarda pedaqoji fəaliyyətlə məşğul olmaq qadağan edilib.
Yeni qanunun əhəmiyyəti və özəllikləri barədə Crossmedia.az-a danışan keçmiş xarici işlər naziri Tofiq Zülfüqarovun fikrincə, yeni qanun diplomatik xidmətin nizam-intizamını və effektivliyini artırmağa yönəlib: "Qanunda bəzi yeni tələblər yer alıb. Əsas dəyişikliklərdən biri diplomatik xidmətdə çalışan şəxslərin siyasi partiya üzvü olmaması ilə bağlıdır. Qeyd olunur ki, dövlət xidmətində çalışan şəxslər siyasətçi deyillərsə, onların hər hansı siyasi partiyanın üzvü olması məqsədəuyğun deyil".
T.Zülfüqarovun sözlərinə görə, bu qayda hərbçilər üçün də keçərlidir.
"Diplomatik xidmət xüsusi dövlət xidməti hesab edildiyi üçün yeni qanunda bu sahəyə aid bəzi məqamların dəqiqləşdirilməsi də nəzərdə tutulur. Bu sənəd diplomatik xidmətdə daha effektiv idarəetməyə və yüksək peşəkarlığa verəcək".
Xumar Əhmədova
18:38 17.02.2025
Oxunuş sayı: 8115
