Gündəm

"Azərbaycan-Suriya münasibətlərində yeni mərhələ başlanır" - Deputat

Azərbaycan Prezidenti İlham Əliyev fevralın 14-də Suriya Ərəb Respublikasının keçid dövrü Prezidenti Əhməd əl-Şaraaya təbrik məktubu göndərib. "Biz Azərbaycan ilə Suriya arasında dostluq və əməkdaşlıq əlaqələrinin inkişaf etdirilməsinə böyük önəm veririk. Azərbaycan ölkənizin bu mühüm keçid dövründə lazımi dəstək və yardım göstərməyə hazırdır", - təbrikdə bildirilib.

Dövlət başçısı, həmçinin qeyd edib ki, bu gün Azərbaycan-Suriya münasibətlərinin keyfiyyətcə yeni səviyyəyə yüksəlməsi və əməkdaşlığımızın yeni məzmunla zənginləşdirilməsi üçün yaxşı imkanlar yaranıb.

Suriyada Bəşər Əsəd rejimi dönəmində Bakı ilə Dəməşq arasında münasibətlər demək olar ki, yox idi. Bunun əsas səbəblərindən biri Suriya hakimiyyətinin Azərbaycan torpaqlarını işğal edən Ermənistanı açıq şəkildə dəstəkləməsi idi. Bu mövqe Azərbaycan və Suriya arasında yaranması mümkün olan diplomatik əlaqələrin inkişafına mane olmuşdur.

Lakin son illərdə regionda və beynəlxalq arenada baş verən dəyişikliklər Suriyanın xarici siyasətində də öz əksini tapmışdır. Yeni hakimiyyət dünya dövlətləri ilə əməkdaşlığı genişləndirməyə çalışır və bunun təkcə siyasi rəhbərlikdə dəyişiklik olmadığını göstərir. Azərbaycan da öz növbəsində Türkiyənin bölgədəki strateji müttəfiqi olaraq Suriyada atılan humanitar və diplomatik addımları yaxından izləyir, bölgədə sabitliyin bərqərar olmasına dəstək verir. Azərbaycan humanitar yardım kampaniyalarında aktiv iştirak edir, Suriya əhalisinin üzləşdiyi çətinliklərin aradan qaldırılmasına töhfə verir.

Hazırda Azərbaycan və Suriya arasında münasibətlərin inkişafı üçün yeni imkanlar yaranır və bu istiqamətdə diplomatik səylərin artırılması gözlənilir.

Mövzu ilə bağlı Milli Məclisin deputatı Aydın Mirzəzadə Crossmedia.az-a açıqlama verib: “Hazırki Suriya hakimiyyərinin Türkiyə ilə münasibətləri olduqca yaxşıdır. Azərbaycan da Türkiyənin strateji müttəfiqi kimi bu gün Suriyada gedən prosesləri yaxından izləyir və dəstəkləyir. Bəşər Əsədin dövründə Azərbaycanla Suriya münasibətləri çox aşağı səviyyədə idi. Yeni hakimiyyət dövründə isə Suriyada həm daxili, həm xarici siyasətin priroritetləri dəyişib. Azərbaycan prezidentinin Suriya prezidenti əş-Şəaraaya məktubu, Azərbaycan-Suriya münasibətlərinə yeni səhifədən başlamağa bir çağırış idi. Qeyd edim ki, bundan əvvəl də Azərbaycan xarici işlər nazirinin müavini Suriyada səfərdə olmuş və Suriya xarici işlər nazirini Azərbaycana səfərə dəvət etmişdi. Eyni zamanda Azərbaycan Prezidenti Türkiyə prezidenti ilə telefon zəngində Suriyada humanitar yardımda Azərbaycanında iştirak edə biləcəyini vurğulamışdı. Bütün bunlar hamısı Azərbaycan-Suriya münasibətlərində yeni dövr açır”.