Ermənistana "dayılıq" edən Aİ: Azərbaycan necə davranmalıdır?
Avropa İttifaqının (Aİ) “missiyası” növbəti dəfə Azərbaycan sərhədində müşahidə aparıb.
Fevralın 12-i saat 10:09-da Ermənistanın Keşişkənd rayonunun Arpa yaşayış məntəqəsi istiqamətində yerləşən Ermənistan silahlı qüvvələrinin döyüş mövqeyinə 2 ədədinin üzərində Avropa İttifaqının və 1 ədədinin üzərində Beynəlxalq Qızıl Xaç Komitəsinin (BQXK) bayrağının olduğu 3 ədəd yolsuzluq avtomobili və Ermənistan Silahlı Qüvvələrinə məxsus 1 ədəd "UAZ Patriot" markalı avtomobilin gəlməsi, 2-i hərbçi və 4-ü mülki şəxs olmaqla ümumilikdə 6 nəfər şəxsin ərazidə müşahidə aparması, digər döyüş mövqeyinə hərəkət edərək Azərbaycan mövqeləri istiqamətində foto və videoçəkiliş etməsi Azərbaycan tərəfindən qeydə alınıb.
Missiya nümayəndələri saat 11:54-də ərazini tərk edərək geri qayıdıblar.
Aİ və BQXK-nın nümayəndələrinin ərazidəki fəaliyyəti Azərbaycan Ordusunun bu istiqamətdə yerləşən bölmələri tərəfindən vizual və texniki vasitələrlə müşahidə edilib.
Son zamanlar missiyanın belə müşahidələrinin sayı artıb. Ümumiyyətlə, fəaliyyət müddəti uzaldılandan sonra missiya sanki fəallaşıb. Nəzərə almaq lazımdır ki, məhz bu missiyanın fəaliyyəti ilə Aİ Azərbaycana qarşı anormal münasibətini günləndirib. Bu, ikitərəfli münasibətlər kontekstində də aydın hiss olunur.
Məsələ burasındadır ki, missiya fəaliyyətə başlayanda Aİ ilə Azərbaycan arasında razılaşma olmuşdu. Lakin ikinci dəfə belə icazə alınmadı. Bunun özü ən azı diplomatik etika qaydalarına uyğun deyil. Azərbaycanla razılaşdırılmadan Azərbaycan sərhədində içində hərbi və kəşfiyyat elementləri olmasına baxmayaraq, dırnaq arasında mülki deyilən missiya göndərilməsi onu göstərir ki, Aİ Azərbaycanla münasibətdə adekvat deyil, onun fikrini nəzərə almayaraq öz riyakar mövqeyini ortaya qoyur. Aİ-nin missiyası özünün ilkin mahiyyət və məramına təmamilə ziddir. Onlar regionda növbəti gərginliyə rəvac verilməsinə çalışırlar. Bu addımlar bilərək gərginlik yaratmağa, Azərbaycanla münasibətləri korlamağa, Azərbaycanın hansısa adekvat tədbir görməsinə və bundan sonra onların onsuz da davam edən “səlib yürüşləri”ni daha da gücləndirmələrinə hesablanıb”.
İndiki vəziyyətdə Azərbaycan müəyyən mənada soyuqqanlı davranmalıdır. Missiya müşahidələrini nümayişkarənə şəkildə həyata keçirir. Elə bil, bilərəkdən Azərbaycanı təxribata çəkmək istəyirlər. Belə bir vəziyyətdə cavab verməmək ən yaxşı cavab olar. Missiyanın tərkibində olan kəşfiyyat elementləri vasitəsilə Ermənistana məlumatların ötürülməsi, bəlkə də, Ermənistanın növbəti toqquşmaya hazırlaşdırılması mümkündür. Amma indiki məqamda rəsmi Bakının ciddi bir tədbir görməyə ehtiyacı yoxdur. Azərbaycan onsuz da öz işini görür, müxtəlif səviyyələrdə Ermənistan və Aİ-nin regionla bağlı planları barədə məlumatı var. Şübhəsiz ki, preventiv tədbirlər də hazırlanır. Azərbaycan bütün ssenarilərə hazırdır. O baxımdan, indiki məqamda missiya ilə bağlı nə isə ciddi bir addım atmaq, əksinə, bəlkə də, ziyanımıza olar, Aİ-nin perspektivdə ölkəmizə qarşı əlini gücləndirər.
Kənan Novruzov
12:53 13.02.2025
Oxunuş sayı: 8888
