Azərbaycan hərbi təhsil sahəsində yeni mərhələyə qədəm qoyub - RƏY
Azərbaycanla Türkiyə arasında qarşılıqlı etimad və strateji tərəfdaşlıq prinsiplərinə əsaslanan hərbi əməkdaşlıq son illərdə yeni istiqamətlər üzrə genişlənir. Xüsusilə birgə hərbi təlimlərin keçirilməsi, müdafiə sənayesi sahəsində birgə istehsal, hərbi kadrların hazırlığı və təcrübə mübadiləsi bu əməkdaşlığın əsas istiqamətlərini təşkil edir. İki ölkənin silahlı qüvvələri arasında əlaqələrin intensivləşməsi hərbi potensialın gücləndirilməsi və regional təhlükəsizlik baxımından da mühüm əhəmiyyət daşıyır.
Bəs Azərbaycan-Türkiyə hərbi əməkdaşlığı hazırda hansı mərhələyə çatıb? Bu tərəfdaşlığın daha da genişlənməsi hər iki ölkənin müdafiə imkanlarına, hərbi qüdrətinə və regionda təhlükəsizlik arxitekturasına nə vəd edir?
Mövzu ilə bağlı Crossmedia.az-a açıqlama verən ehtiyyatda olan polkovnik Üzeyir Cəfərov qeyd edib ki, Azərbaycanla Türkiyə arasında hərbi əməkdaşlıq hazırda ən yüksək səviyyədədir: “Demək olar ki, hər həftə iki ölkənin iştirakı ilə bir və ya bir neçə birgə tədbirin keçirilməsinin şahidi oluruq. Hərbi əməkdaşlığımız müxtəlif istiqamətləri, o cümlədən quru qoşunlarını, hərbi hava qüvvələrini, hava hücumundan müdafiə sistemlərini və hərbi dəniz qüvvələrini əhatə edir. Azərbaycan və Türkiyə hərbçiləri mütəmadi olaraq birgə təlimlər keçirir, müxtəlif məsələlər ətrafında məsləhətləşmələr aparırlar. Bu təlimlər hər iki tərəf üçün faydalıdır. Çünki təlim meydanlarında əldə olunan bilik və bacarıqlar hərbçilərimizin peşəkarlığını, səriştəsini, eləcə də müdafiə və hücum qabiliyyətlərini təkmilləşdirir. Bütün digər sahələrdə olduğu kimi, müdafiə sənayesi istiqamətində də hərbi əməkdaşlığımız genişlənir. Sentyabr ayında Bakıda keçirilən ADEX 2026 beynəlxalq müdafiə sərgisində Azərbaycan-Türkiyə birgə istehsalı olan bir sıra məhsullarla tanış olduq. Bu da göstərir ki, iki ölkə arasında əməkdaşlıq gündən-günə genişlənir və yeni istiqamətləri əhatə edir”.

Ekspert edib ki, Azərbaycan və qardaş Türkiyə bundan sonra da birgə təlimlərin sayını artıracaq, qarşılıqlı səfərləri intensivləşdirəcək: “Çünki bu səfərlər və təlimlər hərbçilərimizin peşəkarlığının artırılmasına, müxtəlif qoşun növləri üzrə təcrübə mübadiləsinin aparılmasına mühüm töhfə verir. Söhbət quru qoşunlarından, komando hərbi hissələrindən, xüsusi təyinatlı qüvvələrdən, rabitə xidmətindən, hərbi tibb və hərbi təhsil sahələrindən gedir. Bu əməkdaşlıq artan dinamika ilə davam edir. Son günlərdə Türkiyə və Gürcüstan Milli Müdafiə Universitetlərinin rəhbərlərinin Azərbaycana səfəri, eləcə də Azərbaycan nümayəndə heyətinin bu tədbirləri yüksək səviyyədə təşkil etməsi, Milli Müdafiə Universitetinin fəaliyyətinin yeni mərhələyə keçdiyini göstərən məqamlardandır. Bütün bunlar deməyə əsas verir ki, Azərbaycan artıq hərbi təhsil və beynəlxalq əməkdaşlıq sahəsində yeni mərhələyə qədəm qoyub. İnanıram ki, bu proses ölkəmiz, dövlətimiz, Silahlı Qüvvələrimiz və ordumuz üçün uğurlu nəticələr verəcək”.
Ayhan
10:20 20.11.2026
Oxunuş sayı: 117