Ağır xəstəlikdən əziyyət çəkən məşhur bloqer estetik prosedura əl atdı
Xərçəng xəstəliyindən müalicə alan rusiyalı bloqer Valeriya Çekalina (Lerçek) dodaqlarına dolğu etdirib.
Crossmedia.az xəbər verir ki, bloqer sosial şəbəkədəki canlı yayım zamanı izləyicilərin diqqətini çəkən dodaqlarındakı göyərmələrlə bağlı sualları cavablandırıb. O, kosmetoloji prosedurdan keçdiyini təsdiqləyərək bunu həkimin icazəsi ilə etdiyini bildirib.
Çekalina uzun müddətdir belə prosedurlara müraciət etmədiyini, lakin dodaqlarını böyütməyi çox arzuladığını deyib. O, xəstə olmasına baxmayaraq, gündəlik həyatına davam etmək istədiyini vurğulayıb.
Bloqer izləyicilərin tənqidlərindən sonra tibbi arayışını da paylaşıb. Sənəddə onun müalicə həkiminin kosmetoloji inyeksiyalar, o cümlədən hialuron turşusu ilə kontur plastikası üçün əks-göstəriş müəyyən etmədiyi qeyd olunub.
Qeyd edək ki, Çekalinaya onkoloji xəstəlik diaqnozu qoyulub. Onun xəstəliyinin dördüncü mərhələdə olduğu və sümüklərdə metastazların aşkarlandığı bildirilir. Bloqer müalicəsini davam etdirmək üçün Çinə getməyi planlaşdırır.
05:48 20.11.2026
Oxunuş sayı: 138