Türkiyə, Pakistan və Səudiyyə Ərəbistanı arasında tarixi müdafiə sazişi təsdiqlənib
Türkiyə Böyük Millət Məclisi (TBMM) Türkiyə, Pakistan və Səudiyyə Ərəbistanı arasında birgə müdafiəni nəzərdə tutan “Məkkə sazişi”ni təsdiqləyib.
Crossmedia.az xəbər verir ki, Türkiyənin “Anadolu” agentliyi bu barədə məlumat yayıb.
Noyabrın 5-də parlamentdə keçirilən səsvermədə sazişin təsdiqlənməsinə dair qanun layihəsi 279 lehinə, 119 əleyhinə səslə qəbul edilib.
2026-cı il avqustun 7-də Məkkədə imzalanan razılaşma üç ölkə arasında hərbi və təhlükəsizlik əməkdaşlığının gücləndirilməsini nəzərdə tutur.
Sazişə əsasən, tərəflərdən birinə qarşı silahlı hücum bütün iştirakçılara qarşı hücum kimi qiymətləndiriləcək.
Razılaşma çərçivəsində ölkələr arasında kəşfiyyat məlumatlarının mübadiləsi, hərbi koordinasiya, birgə çəkindirmə tədbirləri və müdafiə sənayesi sahəsində əməkdaşlığın genişləndirilməsi planlaşdırılır.
Parlamentdə müzakirələr zamanı hakim Ədalət və İnkişaf Partiyasının nümayəndələri sazişin əsas məqsədinin münaqişələrin qarşısını almaq və regional təhlükəsizliyi möhkəmləndirmək olduğunu bildiriblər.
Müxalifət nümayəndələri isə razılaşmanın Türkiyənin digər beynəlxalq öhdəlikləri ilə uyğunluğu və mümkün hərbi müdaxilələrə dair narahatlıqlarını ifadə ediblər.
Qeyd olunub ki, sazişin təsdiqlənməsi Türkiyə hərbçilərinin avtomatik olaraq xarici əməliyyatlara göndərilməsi demək deyil. Bunun üçün parlamentin ayrıca qərarı tələb olunur.
16:29 06.11.2026
Oxunuş sayı: 67
