Yer kürəsində yeni maqnit qasırğası gözlənilir – TARİX AÇIQLANIB
Oktyabrın sonunda Yer kürəsində yeni geomaqnit qasırğasının baş verəcəyi proqnozlaşdırılır. Günəşdəki aktivlik səbəbindən qasırğanın G1, bəzi hallarda isə G2 səviyyəsinə çatması mümkündür.
Crossmedia.az xəbər verir ki, UNIAN Britaniya Geoloji Xidmətinin proqnozuna istinadən bu barədə məlumat yayıb.
Məlumata görə, oktyabrın 29 və 30-da güclü maqnit qasırğası gözlənilmir. Lakin ayın sonuna doğru Günəşin tac dəliyindən yayılan yüksəksürətli plazma axınının Yer kürəsinin maqnit sahəsinə təsir edəcəyi ehtimal olunur.
Mütəxəssislər bu təsir nəticəsində qısamüddətli G1 səviyyəli geomaqnit qasırğalarının yarana biləcəyini bildirirlər.
Eyni zamanda, Günəşdə baş vermiş tac kütləsi atılmasının da Yerə çatması mümkündür. Hər iki hadisənin təsiri üst-üstə düşərsə, geomaqnit aktivliyi G2 səviyyəsinə yüksələ bilər.
G2 səviyyəli maqnit qasırğaları elektrik enerjisi sistemlərində müəyyən dalğalanmalara, radio rabitəsində fasilələrə və peyk naviqasiya siqnallarının dəqiqliyinin azalmasına səbəb ola bilər.
Maqnit qasırğalarının bəzi insanlarda baş ağrısı, yorğunluq və yuxu pozuntuları yaratdığı iddia olunsa da, bu təsirlər barədə elmi sübutlar məhduddur.
Mütəxəssislər ümumi sağlamlığın qorunması üçün kifayət qədər yatmağı, su qəbuluna diqqət etməyi, balanslı qidalanmağı və həddindən artıq yorğunluqdan çəkinməyi tövsiyə edirlər.
01:00 30.10.2026
Oxunuş sayı: 33
