Alimlər Van Qoqun “Ulduzlu gecə” tablosunun real səma mənzərəsindən ilhamlandığını düşünürlər
Cənubi Koreyalı astronomlar Vinsent van Qoqun məşhur “Ulduzlu gecə” əsərində 1889-cu il iyulun 22-də görünən səma mənzərəsinin əks oluna biləcəyini müəyyən ediblər.
Crossmedia.az xəbər verir ki, bu barədə CNN elmi araşdırmaya istinadən məlumat yayıb.
Scientific Reports jurnalında dərc olunan araşdırmaya görə, alimlər tablodakı ulduzların düzülüşünü astronomik modellərlə müqayisə edərək onların Buğa bürcündəki Hiad ulduz topası ilə uyğunluğunu müəyyən ediblər. Tədqiqatçılar həmçinin Ayın və Veneranın mövqelərinin həmin gecənin səma mənzərəsinə uyğun gəldiyini bildiriblər.
Van Qoq əsəri 1889-cu ildə Fransanın Sen-Remi-de-Provans bölgəsindəki psixiatriya xəstəxanasında qaldığı müddətdə yaradıb. Əvvəllər tablonun əsasən rəssamın təxəyyülünün və xatirələrinin məhsulu olduğu düşünülürdü.
Bununla belə, alimlər araşdırmanın nəticələrinin ehtiyatla şərh edilməli olduğunu vurğulayırlar. Ekspertlərin fikrincə, rəssam səmanı müşahidə etdiyi kimi deyil, bədii üslubuna uyğun şəkildə təsvir etmiş ola bilər. Araşdırma tablonun dəqiq hansı tarixdə çəkildiyini qəti müəyyənləşdirmir.
06:40 27.10.2026
Oxunuş sayı: 65
