“SpaceX”in süni intellekt planı: 40 milyard dollarlıq çip maliyyələşdirməsi
ABŞ-ın kosmik və aviasiya şirkəti “SpaceX” süni intellekt infrastrukturunu genişləndirmək məqsədilə təxminən 40 milyard dollarlıq qrafik prosessorları (GPU) və əlaqəli avadanlıqların maliyyələşdirilməsi üçün “Apollo Global Management” şirkəti ilə razılığa gəlib.
Crossmedia.az xəbər verir ki, bu barədə Anadolu Agentliyi məlumat yayıb.
Şirkətin açıqlamasına görə, “SpaceX” “Apollo Global Management” tərəfindən idarə olunan qurumla əsas maliyyə lizinq müqaviləsinin imzalanmasına dair öhdəlik götürüb.
Təxminən 40 milyard dollarlıq maliyyələşdirmə şirkətin yerüstü hesablama infrastrukturu üçün “Nvidia”nın yeni nəsil “Vera Rubin” çiplərinin alınmasını təmin edəcək. Bildirilib ki, bu, indiyədək öhdəlik götürülmüş ən böyük GPU maliyyələşdirməsidir.
“SpaceX” dünyanın ən böyük hesablama infrastrukturlarından birini qurmağı hədəfləyir. Şirkət artan hesablama gücü tələbatını qarşılamaq və böyümə planlarını maliyyələşdirmək üçün maliyyə mənbələrini şaxələndirməyi planlaşdırır.
Maliyyələşdirmə prosesində “Apollo” və “Goldman Sachs”ın rəhbərlik etdiyi maliyyə qurumları qrupu iştirak edir. “BlackRock”, “Goldman Sachs Asset Management” və “KKR” ilə əlaqəli fondlar da layihəyə əhəmiyyətli maliyyə öhdəlikləri götürüblər.
Müqavilənin müəyyən şərtlərin yerinə yetirilməsindən sonra ilin sonunadək tamamlanması gözlənilir. GPU-ların və əlaqəli avadanlıqların təhvil verilməsinə əsaslanan lizinq proqramlarının isə 2027-ci ilin ilk yarısında başlaması planlaşdırılır.
03:20 27.10.2026
Oxunuş sayı: 65
