Xarici xəbərlər
Ərdoğan: Sülhə aparan yolu açmağa çalışırıq
Türkiyə Prezidenti Rəcəb Tayyib Ərdoğan Rusiya ilə Ukrayna arasında əsir mübadiləsindən Afrikadakı vasitəçilik təşəbbüslərinədək müxtəlif istiqamətlərdə sülhün təmin olunması üçün səylərin davam etdirildiyini bildirib.
Crossmedia.az xəbər verir ki, bu barədə Türkiyə Prezidentinin rəsmi açıqlamasında məlumat verilib.
Ərdoğan Türkiyənin xarici işlər naziri Hakan Fidanın ev sahibliyi ilə İstanbulda keçirilən 9-cu İstanbul Vasitəçilik Konfransına video müraciət ünvanlayıb. “Dəyişən dünyada sülh üçün tərəfdaşlıqlar və yeni perspektivlər: vasitəçilik” mövzusuna həsr olunan tədbir “Hilton İstanbul Bomonti” Otel və Konfrans Mərkəzində təşkil edilib.
Konfrans iştirakçılarını salamlayan Ərdoğan tədbirin təşkilinə görə Türkiyə Xarici İşlər Nazirliyinə təşəkkür edib və konfransın uğurlu keçməsini arzulayıb.
İstanbulun əsrlər boyu insanları və mədəniyyətləri bir araya gətirdiyini xatırladan Türkiyə Prezidenti şəhərin bu gün də diplomatiyanın mühüm mərkəzlərindən birinə çevrilməsindən məmnunluğunu ifadə edib.
Ərdoğan bildirib ki, hazırda dünyada münaqişələr artır, gərginlik yüksəlir, beynəlxalq hüquqa və qurumlara inam zəifləyir. Onun sözlərinə görə, Türkiyə belə bir dövrdə tərəflər arasında dialoqun çətinləşdiyi və ümidlərin azaldığı şəraitdə belə diplomatiyadan imtina etməməyi əsas prinsip kimi qəbul edir.
Prezident Rusiya-Ukrayna müharibəsi çərçivəsində əsir mübadiləsi və Afrikada vasitəçilik səyləri də daxil olmaqla, müxtəlif bölgələrdə əldə olunan nəticələrin sülhə nail olmaq istiqamətində istifadə edildiyini vurğulayıb.
17:14 23.10.2026
Oxunuş sayı: 69
