Xarici xəbərlər
Avropa Prokurorluğu Avropa Xalq Partiyasının maliyyə xərclərini araşdırır
Avropa Prokurorluğu (EPPO) Avropa Parlamentində təmsil olunan sağ-mərkəzçi Avropa Xalq Partiyasının (EPP) iki yunan məsləhətçi ilə bağladığı müqavilələrdə vəsaitlərdən mümkün sui-istifadə iddialarını araşdırır.
Crossmedia.az xəbər verir ki, bu barədə Almaniyanın “Süddeutsche Zeitung” nəşri, Niderlandın “Follow the Money” araşdırma platforması və Yunanıstanın “Inside Story” nəşrinin birgə araşdırmasında məlumat verilib.
Araşdırmanın mərkəzində 2024-cü il Avropa Parlamenti seçkiləri ərəfəsində iki məsləhətçiyə ödənilən yarım milyon avrodan artıq vəsait dayanır.
Avropa siyasi partiyalarını maliyyələşdirən Avropa Parlamenti xərcləri həddindən artıq yüksək hesab etdiyi üçün müqavilələrin dəyərini tam ödəməkdən imtina edib. Parlament yalnız ilkin mərhələdə ödənilmiş 110 min avronu qarşılayıb, təxminən 350 min avronun ödənilməsi isə partiyanın üzərinə düşüb.
Məsləhətçilər seçki kampaniyası ərəfəsində partiyanın kommunikasiya işlərini həyata keçirmək üçün işə götürülüblər. Lakin EPP-nin keçmiş əməkdaşları jurnalistlərə bildiriblər ki, məsləhətçilərin xidmət haqları gördükləri işin həcminə uyğun olmayıb.
Məsləhətçilər bu qiymətləndirmə ilə razılaşmayıblar. Onlar sonradan aldıqları vəsaitin bir hissəsini geri qaytardıqlarını bildiriblər.
Avropa Prokurorluğu araşdırmanın aparıldığını nə təsdiq, nə də təkzib edib. Qurum davam edən istintaqa və ya onun nəticələrinə zərər vura biləcəyi təqdirdə bu cür məsələlərə münasibət bildirmədiyini açıqlayıb.
EPP-nin nümayəndəsi isə məsələ ilə bağlı partiyaya rəsmi bildirişin daxil olmadığını bildirib.
“EPP müvafiq qurumların müstəqilliyinə və səlahiyyətlərinə tam hörmət edir. Tələb olunacağı təqdirdə, həmin qurumlara tam şəffaflıq və hərtərəfli əməkdaşlıq təmin etməyə hazırıq”, – deyə partiyanın nümayəndəsi vurğulayıb.
16:51 23.10.2026
Oxunuş sayı: 59
