Elektrik xərclərini azaltmaq üçün evlərə günəş panelləri quraşdırıla bilər
Enerji resurslarına tələbatın artdığı, elektrik enerjisinə qənaətin isə həm dövlət, həm də vətəndaşlar üçün getdikcə daha çox əhəmiyyət qazandığı bir dövrdə alternativ enerji mənbələrindən istifadə məsələsi aktuallaşır. Günəş panelləri artıq bir çox ölkədə evlərin dam örtüklərində, müxtəlif obyektlərdə və açıq ərazilərdə elektrik enerjisi istehsal etmək üçün tətbiq olunur. Bəs bu imkanlardan çoxmənzilli yaşayış binalarında və fərdi evlərdə daha geniş istifadə etmək mümkündürmü?
Təsəvvür edək ki, fərdi evlərin dam örtüklərində, çoxmənzilli binaların isə texniki cəhətdən uyğun balkonlarında və digər yararlı sahələrində kiçik güclü günəş panelləri quraşdırılır. Bu sistemlərdən əldə olunan elektrik enerjisi ev təsərrüfatlarının gündəlik tələbatının müəyyən hissəsini qarşılaya, elektrik xərclərini azalda və ümumi enerji istehlakına qənaət etməyə kömək edə bilər. Beləliklə, həm ailə büdcəsinə düşən yük azalar, həm də elektrik şəbəkəsinə olan tələbatın müəyyən hissəsi qarşılanar.
Bununla belə, günəş enerjisi istehsalı üçün hər binanın damı və ya balkonu eyni dərəcədə əlverişli deyil. Günəş işığının düşmə müddəti, kölgələnmə, panellərin quraşdırılma xərcləri, binanın konstruksiyası və təhlükəsizlik tələbləri nəzərə alınmalıdır. Digər tərəfdən, yağış suyunu toplamaqla onu məişət və texniki məqsədlər üçün istifadə etmək də mümkündür. Lakin yağışdan birbaşa elektrik enerjisi əldə etmək üçün nəzərdə tutulan texnologiyaların səmərəliliyi və iqtisadi cəhətdən nə dərəcədə əlverişli olması ayrıca qiymətləndirilməlidir.
Mövzu ilə bağlı Crossmedia.az-a açıqlama verən iqtisadçı Natiq Cəfərli bildirib ki, dünyanın bir sıra ölkələrində ev təsərrüfatlarının bərpa olunan enerji mənbələrindən istifadəsini təşviq etmək üçün müxtəlif dövlət proqramları həyata keçirilir:
"Bu çərçivədə vətəndaşlara güzəştli və ya faizsiz kreditlər, subsidiyalar və digər maliyyə dəstəyi mexanizmləri təklif olunur. Nəticədə ailələrin elektrik enerjisinə çəkdiyi xərclərin azaldılması ilə yanaşı, dövlətin enerji resurslarına olan tələbatın qarşılanması üzrə yükünün də yüngülləşdirilməsi hədəflənir.
Azərbaycanda da bu istiqamətdə qanunvericilik səviyyəsində müəyyən dəyişikliklər edilib. Lakin alternativ enerji sistemlərinin, xüsusilə evlərdə günəş panellərinin quraşdırılmasının praktikada geniş yayılması məsələsi hələ də aktualdır. Vətəndaşların bu sistemlərə marağını artırmaq üçün təkcə hüquqi imkanların yaradılması deyil, onların maliyyə baxımından əlçatan olması da vacibdir.
Bu baxımdan, Azərbaycanda da ev təsərrüfatlarına günəş panellərinin quraşdırılması üçün faizsiz və ya aşağı faizli kreditlərin, eləcə də dövlət dəstəyi proqramlarının tətbiqi müzakirə oluna bilər. Belə mexanizmlər ilkin quraşdırma xərclərini azaltmaqla daha çox ailənin alternativ enerjiyə keçidinə şərait yarada, uzunmüddətli perspektivdə isə həm vətəndaşların, həm də dövlətin enerji xərclərinə qənaət etməsinə kömək edə bilər".
17:05 23.10.2026
Oxunuş sayı: 66
