Xarici xəbərlər
Paris yaxınlığında silahlı hücum: 1 nəfər ölüb, 4 nəfər yaralanıb
Fransanın paytaxtı Parisin qərbində yerləşən Trapp şəhərində baş verən silahlı hücum nəticəsində azı 1 nəfər ölüb, 4 nəfər yaralanıb. Hadisə irqi və ya dini nifrət zəminində törədilmiş terror aktı ehtimalı ilə araşdırılır.
Crossmedia.az xəbər verir ki, bu barədə “Reuters” və “Associated Press” məlumat yayıb.
Fransanın Milli Antiterror Prokurorluğu iş üzrə istintaqa başlayıb. Qurumun açıqlamasına görə, şübhəli şəxs saxlanılıb. İstintaq terror fəaliyyəti ilə əlaqəli qəsdən adam öldürmə və adam öldürməyə cəhd, eləcə də zərərçəkənlərin irqi, etnik, milli və ya dini mənsubiyyəti ilə bağlı mümkün motivləri əhatə edir.
Fransanın Baş naziri Sebastyan Lekornunun bildirdiyinə görə, hücum Trapp şəhərində baş verib. Yaxınlıqdakı La Verrier şəhərinin meri yaralananlar arasında 12 yaşlı uşağın da olduğunu açıqlayıb.
Trapp şəhərinin meri Əli Rabeh Fransa mediasına bildirib ki, hücum edən şəxs insanlara atəş açarkən təsadüfi hədəflər seçirmiş və hadisə kütləvi qətliam törətmək cəhdi təsiri bağışlayıb.
Fransa Prezidenti Emmanuel Makron sosial şəbəkədə paylaşım edərək həlak olan şəxsin yaxınlarına və yaralılara dəstəyini ifadə edib.
Fransanın sağçı Milli Birlik partiyasının lideri Marin Le Pen də hadisəni pisləyib və hücumun motivlərinin müəyyənləşdirilməsini, məsul şəxslərin isə sərt şəkildə cəzalandırılmasını tələb edib.
16:43 23.10.2026
Oxunuş sayı: 64
