Xarici xəbərlər
Səudiyyə Ərəbistanı ballistik raket istehsalını genişləndirir
Səudiyyə Ərəbistanının daha uzaq mənzilli və daha ağır döyüş yükü daşıya bilən bərk yanacaqlı ballistik raketlər istehsal etmək üçün raket zavodunu genişləndirdiyi ehtimal olunur.
Crossmedia.az xəbər verir ki, bu barədə “Reuters” kommersiya peyk görüntülərini təhlil edən tədqiqatçıların araşdırmasına istinadən məlumat yayıb.
2025-ci ilin aprelindən 2026-cı ilin sentyabrınadək çəkilmiş peyk görüntülərində Ər-Riyaddan təxminən 200 kilometr qərbdə yerləşən əl-Dəvadimi kompleksində yeni tikililər müəyyən edilib.
Xarici Siyasət Araşdırmaları İnstitutunun (FPRI) tədqiqatçıları Sem Lair və Maykl Doytsmanın qiymətləndirməsinə görə, yeni tikililərdən biri mövcud istehsal binasından ən azı iki dəfə böyükdür. Onların ehtimalına görə, burada raket mühərriklərinin istehsalı üçün bərk yanacaq qarışığının qəliblərə töküldüyü xüsusi sahələr yerləşir.
Digər yeni binanın isə yanacaq komponentlərinin və ya hazır raket hissələrinin saxlanması üçün istifadə oluna biləcəyi bildirilir.
Tədqiqatçıların fikrincə, zavodun genişləndirilməsi Səudiyyə Ərəbistanına daha uzaq məsafələrə uça bilən və ya daha ağır döyüş yükü daşıyan raketlər istehsal etmək imkanı verə bilər. Müəssisənin istehsala 2026-cı ilin sonlarında başlaya biləcəyi ehtimal edilir.
16:20 23.10.2026
Oxunuş sayı: 63
