Xarici xəbərlər
Hindistandan İsveçə sevgisi üçün 10 min km velosiped sürən sənətçi
Hindistanlı küçə rəssamı Pradyumna Kumar Mahanandia sevdiyi qadına qovuşmaq üçün ikinci əl velosipedlə 10 min kilometr yol qət edərək Hindistandan İsveçə gedib.
Crossmedia.az xəbər verir ki, “BBC” bu barədə məlumat yayıb.
Pradyumna 17 dekabr 1975-ci ildə Yeni Dehlidə isveçli Charlotte von Schedvinlə tanış olub. O zaman 20 yaşında olan Charlotte portretini çəkdirmək üçün sənət tələbəsi Pradyumnanın qarşısında əyləşib.
Pradyumna görüş zamanı Charlotteın Buğa bürcü olduğunu öyrənib. O, uşaqlıqda bir astroloqun gələcək həyat yoldaşının xarici ölkədən olacağını, Buğa bürcündə doğulacağını və meşə ilə əlaqəsinin olacağını söylədiyini xatırlayıb. Charlotteın isə Buğa bürcündə olduğu, ailəsindən meşəlik ərazi miras aldığı və piano çaldığı məlum olub.
Pradyumna ona “Görüşümüz göylərdə yazılıb. Sən mənim həyat yoldaşım olacaqsan” deyib. Charlotte illər sonra bu sözlərin ardından ilk dəfə ağlından çox ürəyinin səsinə qulaq asdığını bildirib.
Onlar tanış olduqdan iki həftə sonra evlənmək qərarına gəliblər. Charlotte İsveçə qayıtdıqdan sonra cütlük aylarla məktublaşıb. Lakin Pradyumna onun yanına getmək qərarına gəlib.
O, Hindistan, Pakistan, Əfqanıstan, İran və Türkiyədən keçərək Avropaya çatmaq üçün ikinci əl velosiped alıb. Səfərin xərclərini isə yolboyu insanların portretlərini çəkərək qarşılayıb.
Dörd aydan çox davam edən çətin səyahətdən sonra Pradyumna 1977-ci ilin mayında İsveçin cənubundakı Charlotteın evinə çatıb.
Cütlük o vaxtdan, təxminən 50 ildir birlikdədir və iki övladları var. Onlar həmçinin Dalitlərin cəmiyyətdə vəziyyətinin yaxşılaşdırılması istiqamətində fəaliyyət göstərirlər.
Bu sevgi hekayəsi hazırda Oskar mükafatlı rejissor Orlando von Einsiedelin çəkdiyi “Cycle of Love” sənədli filmi ilə yenidən gündəmə gəlib.
01:33 06.10.2026
Oxunuş sayı: 79
