Böyük Britaniya İsrail məskənlərindən idxalı qadağan edir
Böyük Britaniyanın işğal altındakı İordan çayının Qərb sahilində yerləşən İsrail məskənlərindən məhsulların idxalını qadağan etmək qərarı ölkənin Yaxın Şərq siyasətində mühüm dəyişiklik kimi qiymətləndirilir.
Crossmedia.az xəbər verir ki, BBC bu barədə məlumat yayıb.
Qərar Böyük Britaniyanın xarici siyasətində Fələstin məsələsinə yanaşmanın sərtləşdiyini göstərən yeni addım kimi təqdim olunur. Bu açıqlama xarici işlər naziri Ed Milibənd tərəfindən Baş nazir Endi Börnhəmin iştirakı ilə İcmalar Palatasında səsləndirilib.
Böyük Britaniyanın Fələstin dövlətini rəsmi şəkildə tanımasından təxminən bir il sonra qəbul edilən yeni qərar İsrailin siyasətinə yönəlmiş tənqidi mövqenin daha da sərtləşdiyini göstərir.
Milibənd bildirib ki, bu addım İsrail və Fələstin arasında iki dövlətli həllə nail olunması istiqamətində siyasətin davamıdır. Bu yanaşmaya əsasən, İsrailin yanında müstəqil və dayanıqlı Fələstin dövlətinin yaradılması nəzərdə tutulur.
Xarici işlər naziri Böyük Britaniyanın baş verənlərə təsir etmək imkanına malik olduğunu və passiv mövqenin qəbulolunmaz olduğunu vurğulayıb. O, fəaliyyətsizliyin ayrıca bir strategiya sayıla bilməyəcəyini bildirib.
Məlumata görə, Böyük Britaniya bu qərarın hazırlanması prosesində digər ölkələrlə də diplomatik məsləhətləşmələr aparıb. Fransa və Kanada da daxil olmaqla, daha 11 ölkə eyni istiqamətdə tədbirlərə qoşulub.
Britaniya tərəfi hesab edir ki, ölkələrin koordinasiyalı şəkildə hərəkət etməsi qəbul edilən tədbirlərin təsir imkanlarını artıracaq. Eyni zamanda, bir ölkənin İsrail və ABŞ tərəfindən mümkün siyasi təzyiqlərlə təkbaşına üzləşməsi riskinin azalacağı gözlənilir.
12:18 09.09.2026
Oxunuş sayı: 54
