Slovakiyadan Rusiyaya SƏRT ADDIM: Səfirə etiraz bildirilib
Slovakiya Ukraynanın Kiyev şəhərində Ukrayna Təhlükəsizlik Xidmətinin (SBU) binasına endirilən dron zərbəsindən sonra Rusiyanın ölkədəki səfirini çağırmağa hazırlaşır.
Crossmedia.az xəbər verir ki, Slovakiyanın Xarici və Avropa İşləri Nazirliyi bu barədə məlumat yayıb.
Slovakiyanın xarici işlər naziri Juraj Blanár bildirib ki, Rusiya səfirinin Bratislavada nazirliyə çağırılması barədə göstəriş verib.
Nazir hücumu pisləyərək bildirib ki, SBU-nun zərbəyə məruz qalan binası Slovakiyanın Kiyevdəki səfirliyinin konsulluq bölməsinin yaxınlığında yerləşir. Təhlükəsizlik səbəbindən konsulluq bölməsinin fəaliyyəti məhdudlaşdırılıb və hücum zamanı orada heç kim olmayıb.
Blanár Rusiyanı günahsız mülki şəxslərin həyatını və təhlükəsizliyini təhlükəyə ata biləcək addımlardan çəkinməyə çağırıb.
O, həmçinin hər iki tərəfi gərginliyi artıran və münaqişənin sülh yolu ilə həllinə mane olan yeni eskalasiyadan yayınmağa çağırıb.
12:37 05.09.2026
Oxunuş sayı: 47
