Finlandiya Rusiya təhlükəsinə hazırlaşır: Mülki müdafiə təlimi
Finlandiya II Dünya müharibəsindən bəri Avropanın ən böyük mülki müdafiə təlimlərindən birini keçirir və 2 mindən çox insan fövqəladə vəziyyətlərə hazırlıq üzrə məşqlərə cəlb olunub.
Crossmedia.az xəbər verir ki, Associated Press bu barədə məlumat yayıb.
Təlimlər Finlandiyanın Kuopio şəhərində keçirilir. “Shelter 2026” adlanan iki günlük məşqlər zamanı iştirakçılar raket zərbələri, kiberhücumlar, elektrik və su təchizatının dayanması kimi fövqəladə ssenarilər üzrə fəaliyyətləri məşq edirlər.
Təlim çərçivəsində sakinlərin yeraltı sığınacaqlara yerləşdirilməsi, fövqəladə vəziyyət zamanı dövlət qurumları, könüllülər və digər təşkilatlar arasında koordinasiyanın təmin edilməsi də sınaqdan keçirilir.
Kuopioda adi vaxtda idman və tədbir mərkəzi kimi istifadə olunan, fövqəladə vəziyyətdə isə sığınacağa çevrilə bilən yeraltı kompleksdə 7 minədək insanın yerləşdirilməsi mümkündür. Təlim zamanı burada yüzlərlə iştirakçı gecələyib, hərbçilər isə radiasiyanın ölçülməsi və digər fövqəladə prosedurları məşq ediblər.
Finlandiyanın mülki müdafiə sistemində təxminən 50 500 sığınacaq mövcuddur və onların ümumilikdə 4,8 milyon nəfəri qəbul edə biləcəyi bildirilir.
Təlimlər konkret təhlükəyə cavab olaraq deyil, mümkün böhranlara hazırlıq məqsədilə keçirilir. Finlandiya rəsmiləri və təlim təşkilatçıları əsas diqqətin qərarvermə, rabitə, əhalinin məlumatlandırılması və böhran zamanı əməkdaşlıq imkanlarının yoxlanılmasına yönəldiyini bildirirlər.
Təlimlərdə Ukraynanın müharibə təcrübəsindən də istifadə olunur. Xüsusilə raket və dron hücumları zamanı insanların sığınacaqlara çatması üçün çox az vaxtın qalması Finlandiyada nəzərə alınan əsas məqamlardan biridir.
14:11 04.09.2026
Oxunuş sayı: 45
