Əziz Əliyevin xidmətləri geniş şəkildə araştırılmalı, gənc nəslə ötürülməlidir
Azərbaycanın görkəmli dövlət və elm xadimi, səhiyyə təşkilatçısı, tibb elmləri doktoru, professor Əziz Məmmədkərim oğlu Əliyevin anadan olmasının 130 illiyi ilə bağlı Prezident İlham Əliyev Sərəncam imzalayıb. Sərəncamla yubileyin layiqincə qeyd olunması və bununla bağlı tədbirlər planının hazırlanması nəzərdə tutulur. Əziz Əliyev Azərbaycan səhiyyəsinin və tibb təhsilinin formalaşmasında mühüm rol oynamaqla yanaşı, müxtəlif məsul dövlət vəzifələrində çalışaraq dövlət idarəçiliyinin inkişafına da böyük töhfələr verib. İkinci Dünya müharibəsi illərində mühüm hərbi-siyasi əhəmiyyət daşıyan proseslərdə fəaliyyəti, eləcə də Azərbaycan-Dağıstan münasibətlərinin möhkəmləndirilməsi istiqamətində gördüyü işlər onun çoxşaxəli fəaliyyətinin mühüm istiqamətlərindəndir.
Bəs Əziz Əliyevin 130 illiyinin dövlət səviyyəsində qeyd olunmasını necə qiymətləndirmək olar? Onun Azərbaycan xalqı və dövlətçiliyi qarşısındakı əsas xidmətləri nədən ibarətdir?
Mövzu ilə bağlı Milli Məclisin deputatı, Qərbi Azərbaycan İcmasının sədri Əziz Ələkbərli Crossmedia.az-a açıqlama verib: “Bu Sərəncamı ilk növbədə tarixə və milli yaddaşa verilən yüksək qiymətin ifadəsi kimi dəyərləndirirəm. Çünki Əziz Əliyev yalnız müəyyən bir dövrdə yüksək dövlət vəzifələri daşımış şəxs deyil, öz fəaliyyəti ilə Azərbaycan dövlətçilik tarixində dərin iz qoymuş böyük ziyalı və dövlət xadimidir. Belə şəxsiyyətlərin yubileylərinin dövlət səviyyəsində qeyd olunması onların keçdiyi həyat yolunun yenidən öyrənilməsi, xidmətlərinin cəmiyyətə çatdırılması və gələcək nəsillərə ötürülməsi baxımından mühüm əhəmiyyət daşıyır. Prezidentin Sərəncamında da Əziz Əliyevin xalqa xidmət nümunəsi yaratmış nadir şəxsiyyətlərdən biri olduğu xüsusi qeyd edilir. Məncə, bu yubiley yalnız bir tarixi şəxsiyyətin xatırlanması ilə məhdudlaşmamalıdır. Əziz Əliyevin dövlətçilik baxışları, idarəçilik təcrübəsi, elmə və təhsilə münasibəti, səhiyyənin inkişafındakı xidmətləri daha geniş şəkildə araşdırılmalı, onun irsi gənc nəslə çatdırılmalıdır. Çünki cəmiyyətlərin inkişafında yalnız yeni layihələr deyil, keçmişdən gələn sağlam dövlətçilik ənənələrinin qorunması da mühüm rol oynayır.
Əziz Əliyevin xalq qarşısında xidmətlərindən danışan deputat qeyd edib ki, Əziz Əliyevin xidmətlərini bir sahə ilə məhdudlaşdırmaq mümkün deyil: “O, həkim, alim, səhiyyə təşkilatçısı, pedaqoq və dövlət xadimi kimi fəaliyyət göstərib və bu istiqamətlərin hər birində özündən sonra gələn nəsillərə böyük bir irs qoyub. Onun ən böyük xidmətlərindən biri Azərbaycanda səhiyyə sisteminin müasir əsaslar üzərində qurulmasına verdiyi töhfədir. Tibb təhsilinin inkişafı, milli tibbi kadrların hazırlanması və səhiyyə idarəçiliyinin təkmilləşdirilməsi sahəsində gördüyü işlər onun adını Azərbaycan tibb tarixinin ən mühüm simalarından birinə çevirib. Prezidentin 130 illik yubileylə bağlı Sərəncamında da bu məqamlar xüsusi olaraq vurğulanır. Amma Əziz Əliyevin fəaliyyətinin yalnız səhiyyə ilə ölçülməsi doğru olmaz. O, mürəkkəb və taleyüklü tarixi mərhələlərdə dövlət idarəçiliyində mühüm qərarlar qəbul etmiş, müxtəlif məsul vəzifələrdə çalışmış, Azərbaycan dövlətçilik məktəbinin formalaşmasına öz töhfəsini vermişdir. İkinci Dünya müharibəsi illərindəki fəaliyyəti də onun dövlət xadimi kimi imkanlarını və məsuliyyətini göstərən mühüm səhifələrdəndir”.
Ayhan
10:30 22.08.2026
Oxunuş sayı: 287
