Ukrayna İran məhsulları daşıyan yük maşınlarını hədəfə alır
Ukrayna pilotsuz uçuş aparatlarının Rusiya-Belarus sərhədində İran məhsulları daşıyan yük maşınlarına zərbələr endirdiyi iddia olunur.
Crossmedia.az xəbər verir ki, “Mash” Telegram kanalı bu barədə məlumat yayıb.
Məlumata görə, ən çox Bryansk vilayətində yerləşən “Krasnıy Kamen” keçid məntəqəsinin terminalı hücuma məruz qalır. Son bir həftə ərzində məntəqənin ərazisində ən azı üç zərbə qeydə alındığı bildirilir.
Hücumlar zamanı Belarus istiqamətində İran xurması və qarpızı daşıyan yük maşınlarının yandığı qeyd olunur. Hadisələrdən birində pilotsuz uçuş aparatı hərəkətdə olan yük maşınına hücum edib. Sürücü avtomobili Qomel vilayətinə qədər idarə etdikdən sonra tüstülənən qoşqunu orada saxlayıb.
Məlumata görə, həmin keçid məntəqəsinin yaxınlığında iki mülki avtobus da PUA hücumuna məruz qalıb.
“Mash” hücumların dalğalar şəklində həyata keçirildiyini iddia edir. Əvvəlcə ərazidə kəşfiyyat PUA-sının, daha sonra isə hər 10-15 dəqiqədən bir qruplar halında digər dronların uçduğu bildirilir.
Telegram kanalının məlumatına görə, son vaxtlar PUA-lar Çerniqov vilayətinin Xalyavina kəndi ərazisindən buraxılır.
10:10 19.08.2026
Oxunuş sayı: 215
