COP29 beynəlxalq ictimaiyyətin gözləntilərinə cavab verəcək.
Crossmedia.az xəbər verir ki, bunu Türkiyənin mədəniyyət və turizm naziri Mehmet Nuri Ersoy COP29-da “Mədəniyyətə əsaslanan İqlim dəyişikliyinə qarşı mübarizə üzrə Yüksək Səviyyəli Fəaliyyəti Dialoqu”nda deyib.
"Əminəm ki, Azərbaycanın rəhbərlik etdiyi bu konfrans iqlim dəyişikliyi ilə mübarizə və beynəlxalq ictimaiyyətin gözləntilərinə cavab vermək üçün qlobal səylərimizdə əsas addım olacaq", - o bildirib.
Nazirin sözlərinə görə, hələ görüləsi çox iş var və lazımi nəticələrin əldə olunması üçün beynəlxalq əməkdaşlığın davam etdirilməsi zəruridir.
"İqlim dəyişikliyi mədəni və təbii irsimizə də təhlükə yaradır. Bir çox mədəni və təbii obyektlər ekstremal hava hadisələrinin təsirlərinə qarşı daha həssas olur. Bu risklər gələcək nəsillər üçün ümumi irsimizin qorunmasının təcili ehtiyacını vurğulayır", - o bildirib.
Ersoy qeyd edib ki, Türkiyə Azərbaycanın COP29-da sədrliyinin iddialı məqsədlərini tam dəstəkləyir.
“Biz hamı üçün davamlı gələcək yaratmaq üçün birlikdə işləməyə sadiqik” - o bildirib.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
